تحفة المساجلات ( كامل )

بسم الله الرحمن الرحيم

ـــــ

الفصل الأول

يضم هذا الفصل تراجم الشعراء، وأشعارهم، وأخبارهم، ( أي الكتاب كامل ما عدا المقدمات)، كما يلي:

1- ترجمة شاعر

هو الشاعر بجاد بن حمدان بن غشام المربوث، السحيم، الفردة، من مسروح، من قبيلة حرب، عاش في بادية شمال القصيم، وتوفي رحمه الله سنة 1373 هـ 0
شاعر مجيد، شعره حسن الصياغة، محكم المضمون، يتحدث فه بالسليقة، كان مشهوراً بكرمه، وبحسن استقباله للضيوف، وله مساجلات شعرية مع عدد من الشراء، ولكن مع الأسف إن أغلب قصائده فقدت، حيث توفي عليه رحمة الله منذ 43 عاماً، فاندثرت أشعاره ولم تحفظ، رويت له في ديوان " المجموعة الظريفة " الطبعة الثانية الصفحة 47، وفي الطبعة الثالثة الصفحة 37 قصيدة بعنوان (لازم يهلي به)، وله في هذا الديوان:

1- تنشّد مسيعيد

له من قصيدة وجهها إلى صديقه، الشاعر فايز البسيس:

هد السلوقي لا تـهيبك الأطراد = وترى زريقك ما تجيه الصياييد
كلش من الله وأنت ربك إلى عاد = يقدر يجمّع مثل علياء وأبا زيد
والحب ما يخفا على كل طرّاد = وكانك مكذبنـي تنشّد مسيعيد

بجاد المربوث الحربي

2- هو وإيّا عميله

وله:

يا سليم القلب خفخف له وخافـي = من عميل الخير مالي فيه حيله
ما يريد الهرج غير السلم وافـي = حطني بين السناء هو
قمت له بالبيز والدلّه اخلافـي = راع قلبي يوم جاء يومي شليلـه
يا سليم العلم يبي له ملافـي = مثل ابن فرحان هو وإيّا عميله

بجاد المربوث الحربي

كان للشاعر بجاد المربوث عميلاً، قيل إنه يطلب بجاد خمسة ريالا فرانسية، حين كان الريال الفرانسي هو العملة المتداولة، وكان نزقاً، حاد اللسان، سيئ العملة، وذات يومٍ كان بجاد يسوق فناجين القهوة على عددٍ من الرجال في مجلسه كعادته، وفجأةً رأى عميله قادماً إليهم، وكان قد مهل بجاد إلى هذا الوقت كفرصةٍ أخيرة لتدبير المطلب كاملاً غير منقوصٍ، ولم يكن بجاد قد أوجد مطلبه، فراعه قدومه، لأنه لا يرى لنفسه حيلةً للخلاص منه، أو دفعه لوقتٍ معين، لعلمه أن عميله لن يرضى عذراً بالسهولة، بل إنه جدير بأن يصر على طلب تسديده، حتى ولو أدى ذلك إلى جدلٍ يجلا إلى وقوع خلافٍ بين الطرفين 0
وبعد أن وصل العميل وسلم، وجلس، ساق بجاد إليه فنجان القهوة الجاهزة، حتى تمّم العميل من تناول القهوة، فعاد بجاد إلى مجلس القهوجي وأخذ يجدّد القهوة لعميله، وقبل أن تجهز القهوة بقليل طلب عميل بجاد من بجاد أن يعطيه المطلب الذي عنده، فقال بجاد: أبشر، لكن طوّل بالك، حتى أتفرغ بعد قليل، وينسمح أمرك، إن شاء الله 0
فغضب عميله، وقال: لا مجال عندي لطول البال، وأنا أمهلتك ولا أرى ما يدل على اهتمامك بإعطائي حقي عليك، لتوفّر عليّ المشاوير والتعب، فأخذ شخص من الجالسين، يدعى سليم، يهدّي غضب الديان، ويحاول الإصلاح بينه وبين مدينه (بجاد)، فطلب منه أن يعمل مع عميله معروفاً، فيعطيه مهلةً ليسعى خلالها في إيجاد المطلب، لكن الديان ازداد إصرارا على رأيه، وفي هذا الأثناء، جهزت القهوة الجديدة، وكان بجاد وهو يقوم بتحضيرها، يستمع إلى كلام سليم مع عميله، فيرى كلامه طيباً، وحكيماً، فيحز بنفسه أن يقول لسليم: لا تخاطبه بهذا الكلام، الذي يحتاج لشخصٍ عاقلٍ يستوعبه، ويقدره، فأخذ بجاد البيز( )، ونهض إلى عميله، ليسوق عليه القهوة التي عملها له، حتى وقف أمامه فأكتشف إنه نسي الدلة، وجاء يحمل البيز فقط، بعد ذلك قال بجاد قصيدة يخاطب فيها سليم منها الأبيات السابقة، فطلب سليم من الرجال الموجودين في المجلس، أن يسددوا عن بجاد، فسددوا، أما قوله: ((مثل ابن فرحان هو وإيّا عميله))، فهو يقصد بابن فرحان: غلاب بن فرحان الحربي، وعميله؛ خلف بن عبيد الحربي، وهذان الشخصان، سبق إن وقعت بينهما قصة تدل على حسن العفو، وكرم الخُلقِ، والصفح وترك الحق مروءةً، وسخاءاً، وسبق لبجاد إن سمع لقصتهما وأعجب بطيبهما، وحسن فعلهما 0

قصة ابن فرحان هو و عميله

كان خلف بن عبيد من الكتمة من بني علي من حرب، كريماً ((ما جت به غدت به))، وفي سنة 1349هـ كان عند غلاّب بن فرحان من الدهيم من بني علي من حرب نياقٌ عارضهن للبيع، فقال لابن عبيد (خلف): اشترهن 0 قال ابن عبيد: لا أستطيع مشتراهن، لأنك ستغليهن عليّ 0
قال غلاّب بن فرحان: لا،لن اغليهن عليك، وإنما سأبيعهن عليك بمبلغ ثلاثمائة ريال( )، قال ابن عبيد: لا بأس، ولكني لأجد قيمتهن حالياً، قال ابن فرحان: إذن تدفعها بعد سنة 0 قال ابن عبيد: اشتريت 0 فأشترى النياق، وبعد مضي سنة عند حلول تسديد المبلغ، صادف ذلك إن ابن عبيد قد أحال ضمن من أحال من قومه، في طلب الكلأ، وقطنوا على أحد العدود، في ناحية الجنوب من القصيم، وابن فرحان قاطن على البشوك، في شمال المملكة 0 فسافر ابن فرحان إلى عميله ابن عبيد، ليتقاضى المبلغ الذي له عليه، وعندما حل ضيف عنده، ذبح ابن عبيد ذبيحةً، قدمها قرى لابن فرحان، فلمّا فرغ ابن فرحان من تناول وليمته، قال لعميله مضيفه: لو سمحت احترف لي بالمبلغ الذي عندك، لأنني مستعجلاً، وسأعود إلى أهلي بالحال 0 قال ابن عبيد: إن شاء الله، فنهض، وغاب برهةً، ثم عاد وجلس 0 قال ابن فرحان: يا أبو فهد، أما دبّرتَ شيئا ؟ قال ابن عبيد: لا والله، ياغلاّب، فوالله إنني لا أجد سواء الشاة التي ذبحتها لك، وقبل قليل ذهبت ألتمس أحداً يسلفني، ولم أجد من يسلفني، ولكن خيرها بغيرها، وبحول الله نتقابل مرةً أخرى، أعطيك حلالك 0 قال غلاّب بن فرحان: يا أبو فهد، مائة ريال من مطلبي عندك اشتر بها جملاً لابنك فهد يحمل عليها بيته، ويرافق الناس عليه، ومائة اعتبرها قيمةً للذبيحة التي ذبحتها لي، ومائة اعتبرها قيمة لهذه العصا التي في يدك، واعطني العصا لأفتك بها من كلاب القطين، واعتبرني خلصت، ولا لي عندك أي مطلب، وكرّمك الله، فنهض وعاد إلى أهله 0

2- ترجمة شاعر

ما يعودونه

قصيدة مساجلة للشاعر بلاج الربخ مع الشاعر فايز البسيس: الشاعر/ بلاّج بن مانع الربخ، من الدهيم، من بني علي، من قبيلة حرب، من مواليد عام 1325هـ تقريباً 0
شاعرٌ مجيد، يجيد صياغة الشعر النبطي، باحساس مرهف، تتسم قصائده بسمة البداوة في جزالة الألفاظ، وعفّة المقصد، ونزاهة المعنى، له بعض القصائد التي يوثق بها بعض غزواته التي شارك بها في بعض غزوات قومه، منها هذه القصيدة يسندها إلى الشاعر/ فايز البسيس الحربي، ويضمنها تذكير فايز بالزمان الماضي، ويطلعه فيها على بالغ وجده، وعميق أساه، وألمه على الماضي، وعلى مما لا يرى منه سوى الذكريات الغابرة، ومن تلك الذكريات بئر مهجورة، بعدما كانت جوانبها محاطة ببيوت القطين، مزدحمة بالوارد والصادر، من رعايا إبل البادية، صاخبةً بأصوات الحادي والبادي، واللقّاي والمودِه، والدوّار، والضيف، والرحيل والنزيل، وغير ذلك من الذكريات الجميلة، عن حياة البادية وأهلها 0 لعله يسمع من فائز ما يعزيه، ويصبره، عما في نفسه، لأنه من أقرانه، ويعرف ما يقصد:

يا عد طوّل منامك ليه ما تاعي = ما غير ذيبك يجر الصوت بلحونه
وين أهل الخيل اوين الطرش والداعي = وا ظنتـي يوم قفو ما يعودونه
أهل بيوتٍ نبت للضيف شرّاعي = ومضوّلع النجر للمقبل يدنونه
وإن صاح صياحهم ثم طنّب الراعي = ما صفّحت خيلهم والموت يردونه
قولو لفايز عريب الجد والباعي = وقتٍ عليه طويل وعامر كونه
ما شاف بالدبدبه يوم الدبش زاعي = شوفي بعيني طمّاع القوم يشعونه
يتلون شيخٍ عريب الجد صعصاعي = خلا المعوفي على مشيه وبالهونه
اصيح أنا صيحة ما أشوف فزاعي = إلا أذكر اللي بدين وكاتبٍ شونه
عند الحليله وغادٍ له تبعباعي = اللي شحذ دلته والنوم بعيونه

شعر الشاعر/ بلاج مانع الربخ الدهيمي العلوي الحربي

تقل مجنونه

قصيدة للشاعر فايز البسيس رداً على مساجلة الشاعر بلاج الربخ:
الشاعر فايز بن فرّاج بن لافي البسيس، من الكتمة، من بني علي، من مسروح، من قبيلة حرب، ولد عام 1326هـ تقريباً، وتوفي رحمه الله سنة 1422هـ 0
شاعر مجيد، يتميز شعره بحسن الديباجة، وعفّة اللسان، وجودة الصياغة، والوصف، وصدق الإحساس، له قصائد في مختلف المجالات، والمناسبات، كالحماس، والفخر، والمدح، والغزل، وغيره 0 له القصيدةالآتية، قال رداً على مساجلة الشاعر بلاج الربخ السابقة:

بديت بالمعتلي واجبت للداعي = الواحد اللي جميع الخلق يرجونه
يا ابو محمد وسيع البال ما يراعي = دنياٍ علينا تقلّب تقل مجنونه
قبل الظعاين تباري شقح الأقطاعي = من الحوايا إلى أم نقي يرعونه
وإلى برق بارقٍ ينساق لماعي = من مدلهمٍ يلوح البرق يأركونه
مع دربـهم يتعب الدوّار والراعي = العشب لو حال دونه خوف ياطونه
الله يعز الاسلام ويحفظ الراعي = اللي حما نجد والعدوان يشكونه
خلاّ الغنم مع عيال الذيب رتاعي = الحاكم اللي يقص الراس وامتونه

شعر الشاعر/ فايز فراج البسيس الكتمي العلوي الحربي 0

3- ترجمة شاعر

هو الشاعر حوّاس بن غازي الديري، من الكتمة، من بني علي، من مسروح، من قبيلة حرب، ولد في مدينة قبة، سنة 1379هـ، وهو حالياً من سكانها ومن شعرائها البارزين 0
شاعر مجيد، يتسم شعره بشيءٍ من سعة الإطلاع، والتعمّق في حسن الإختيار، واصالة الصياغة، وتميز التركيب، والتعبير 0
تطرق بقصائده البديعة، إلى مختلف المواضيع، وله فيها مساهمات، عبر وسائل الأعلام، التي لها إهتمام بنشر الشعر الشعبي، ومساجلات مع بعض الشعراء 0

4- هذا مساره بالأدوار

وله جواباً على قصيدٍ وجهها إليه الشاعر/سعود الوصّي الحربي:

جاني جوابٍ من رفيقٍ شكا لي = يقول لي من وقتنا اليوم محتار
يشكي عليّ الوقت جاء به ميالي = وايضا هل النمّه سمع منهم أخبار
اليوم يوم اسعود خطه عنالي = ما تنفع الشكوا على طافـي النار
أبا أبذل المجهود في كل حالي = عاداتنا باللازمه دوم حضّار
طبعٍ لنا في ماضيات الليالي = ما نغيره لو صار بالوضع ما صار
يا أبو طلال أسمع كلامٍ بدالي = يوم أنت تطرب للنصيحه والأشوار
تذكر زمانٍ فيه شفت الهوالي = واتقول ضاع الطب هو وايا الإبصار
تغيرت دورات سود الليالي = هذا حسب ما قلت لي ضمن الاخبار
الوقت هو الوقت يا ابن الحلالي = يديره مدير الفلك هو وال الأقدار
اللي تغير طبع الأجيال تالي = وإلا الدهر هذا مساره بالأدوار
تذكر هل النمّه جنوب وشمالي = هل النقيلي تنقله ناسٍ أشرار
ناسٍ تجارتـهم بقولٍ وقالي = وابليس أخو مرّه لهم نوع سبّار
اللي على الغافل عذاب ووبالي = راع النميمه هو خراب أهل الدار
ناقص ودايـم بالمجالس يلالي = ويكفيه عيب إنّا نسمه ثرثار
يعل ماله مع هل الدار تالي = حيٍ شقي وميتٍ ماله أذكار
والبوم لو هو رام روس العوالي = ما شيف فوق الوكر يدعيه صقار
مالك ومال اهروج ناسٍ تقالي = الداب هو وشجرته حطه يسار
خلّه يموت وسم الأنياب كالي = عن شجرته تلقا مع الدرب معبار
خذ النصيحه يا كريم السبالي = من مخلصٍ قصده يجنبك الأضرار
يا سعود لغزك شفت حله قبالي = حلّه بسيط وعندنا بالوطن سار
شرحت لك عنّه بماضي مقالي = ولاني بملزومٍ على كشف الأسرار
لوكان أبا أشرح عنه طال المجالي = وأبا اختصر ما قلت يا عقب الأخيار
وأقبل تحيات الوفا والكمالي = وسلمت يااللي تكرم الضيف والجار
وصلاة ربي عد وبل الخيالي = على النبي مع صاحبه داخل الغار

حوّاس الديري الحربي

4- ترجمة شاعر

هو الشاعرخالد بن محمد بن ماجد بن خضران، من البيضان، من بني عمرو، من مسروح، من قبيلة حرب 0
ولد في مدينة دخنة في القصيم سنة 1384هـ 0
شاعر مجيد، شعره محكم السبك، رصين المعنى، حديث التعبير، خالٍ من التكلف جزل الألفاظ، له العديد من القائد في مختلف الأغراض والمناسبات، شارك في الكثير منها، عبر وسائل الأعلام المحلية، والخليجية، كالأذاعات، والصحف، والمجلات، وأشعاره كثيرة، وفي غاية الجودة، ويمكن وضعها في ديوان مستقل 0

1- لابان المخفّا افضحته

له مساجلةً مع قصيدة للشاعر/ دليم بن مرزوق الشدادي الحربي:

سر يا قلم في شور فكري ويخبرك = عن قاف شعرٍ من ضميري طرحته
لكتابة الأشعار ملزوم نصخرك = تكتب لنا منهاج قافٍ نطحته
واليا كتبت أبيات شخصٍ امسيرك = اذكر سلامي عد برقٍ لمحته
يا دليم ابن مرزوق بالشعر خابرك = إليا بنيت الشعر هزله جمحته
خطك وصلني فيه موجز خواطرك = ترمز لدرسٍ بإختيارك نجحته
شكيت قلبٍ بأول الوقت كدّرك = غطّسك في بحر العذاب وسبحته
القلب كانه مثل ما قلت مسهرك = ترتاح كان الزند ضده قدحته
حذرا تشاور واحدٍ ما يشاورك = مهما موازين المغرّه ارجحته
الناس لا تدري بسرك وظاهرك = الناس لابان المخفّا افضحته
كم واحدٍ لا شفت زوله إمجاورك = من شان زوله للخضيراء زقحته
وإليا بغيت إتناصره ما يناصرك = تقول ليت إصدوف بقعاء إنقحته
بس إنتبه يا دليم وإخفض متاجرك = ترى البحر ما ينّزح لو نزحته
من قبل شد الطنب ثبّت مخاطرك = وإليا بنيت البيت خلّل اسنحته
وإليا كربت الطنب في ستر وامرك = ما يحترك لو الهبايب الفتحه
واللاش وِلد اللاش حذرا يعاشرك = ترى أبرك الساعات كانك كسحته
والوقت لو بالغرابيل بادرك = يهون كان إبعزم صبرك كفحته
هذي هي الدنيا لزومٍ اتقاشرك = يومٍ قشر اليوم الآخر فرحته
واللي كتب باللوح لابد ينحرك = صيور ما يكتب إبعينك شبحته
وما قلت عله نال لإعجاب خاطرك = ما دام نظم القافيه ما صفحته
أنا معك بالصعب وأعبر معابرك = ما أغيّر الطاروق لو هو على أحته

خالد البيضاني الحربي

2- للخلايق ما شكيت

وله في الطبع، والوفاء رغم الظروف التي لا تساعد على الوفاء بكل بكل الألتزامات والواجبات:

يا زمان حوّل الوافي بطول = الوفي وشلون بإحراجه رضيت
أول المشوار لوعاتك تهول = وآخر المشوار مثل اللي بديت
كن ما قبلي ولا بعدي إزحول = شاب رأسي وأنت مني ما انتهيت
حار فكري فيك أدور لي حلول = ليتني توي على الدنيا نشيت
وش تقول الناس عني وش تقول = يوم أواعدها وأخالف ما وفيت
بالوفاء خيلي قداوه للخيول = لين يا وقت الشقاء ضدي قسيت
من صعد وإحتاط في وقت النزول = ما يهمه ليت ما سويت ليت
لو تزول إجبال طبعي ما يزول = عيبي إني للخلاق ما شكيت
أتخيّر مخرجي قبل الدخول = وأكتم اللي صار ما كني دريت
عاسفٍ نفسي مثل عسف الذلول = لأجل ما تهدم جميع اللي بنيت
للسعاده ما تحقق لي وصول = والنكد بأسهل وسيله له عنيت
إن قطفت الورد يأتيني ذهول = وإن وطيت الجمر مدري وش وطيت
أعشق التنكيد لو دربه يطول = شاربٍ هم الزمن لين إرتويت

خالد البيضاني الحربي

3- يناجي صاحبه بالزوايا

وله في النقد، والتوجيه:

يا قلم ما نشيلك داخل الجيب زينه = مشترينك إتسجل مادرات الخفايا
سجل الشعر للي سيرك في يمينه = قرّب أوراق وأنت إبصفّهن لك مزايا
سيّرك في يمبنه يوم بيّح كنينه = موهبه من ولي العرش رب البرايا
كل ما دار بالأفكار خطه إبعينه = ثبته بالورق واحذر إتبقي بقايا
لا تطوف المعاني والبيوت الثمينه = يوم قامت توافد في صميم الحنايا
ضاق صدري وقال القلب خافي حزينه = ثم تيت من جزل المثايل قايا
ودي أشرح كلامٍ كم لنا كاتمينه = ما حسبنا إحساب إمروجين الحكايا
قبلنا قيل لأجل العين تكرم مدينه = قدّر الكلب لأجل أهل الوفاء والحمايا
شيم الكلب من شيمة هلٍ جايبينه = لا تعم الدهايا في إفعول الهفايا
منهج الطيب واضح والملاء خابرينه = من مشى فيه يرقا فوق روس العلايا
ما مشى الطيب غير أهل العقول الرزينه = والرداء مسلك الهافي خبيث النوايا
يا حسافه على دورٍ تلاشت اسنينه = دور الأجداد وإزحول الرجال الدهايا
وإحترام المجالس له وقار وسكينه = وإن هرج شخص منهم قيل فيه الكفايا
لا هرج شخص واحد كلهم منصتينه = من بداية كلامه لين وقت النهايا
بس هالحين كار السالفه يستهينه = جاهل العرف واللي ما حسب للزرايا
مات كار السوالف واسأل إمجربينه = للأسف صار يحسب من إحساب الضحايا
مجلس اليوم لاجيته يغثك رطينه = كل شخصٍ يناجي صاحبه بالزوايا
إكتشفته وكل أهل الوفاء كاشفينه = وأرجي المعذره كان المثل به خطايا
ما نعم البشر واللي يخالف ندينه = المحشم محشم والعرايا عرايا
تم قافي وموجز قافنا صاخرينه = من إبنوك إبفكري للمثايل ملايا

خالد البيضاني الحربي

4- نوادر خزينه

وله في النسيب:

مزّع ستار الصمت عن مخزن الجوف = والمختفي بيّن نوادر خزينه
ترى حلاة الحب لاصار مكشوف = بيني وبينك والملاء خابرينه
اخلص معي لا يعتري قلبك الخوف = حب الشرف لو بان ما احدٍ يدينه

خالد البيضاني الحربي

5- بالحقايق يناجيك

وله:

لو قلت بأعلى صوت لا ترتجيني = اسكت وكنّي ما سمعتك وأنا أرجيك
وان قلت لي رح وأنسني لا تجيني = أقول حاضر وابتعد عنك واجيك
تدفعني أشواقي وزايد حنيني = يمك وقلبي بالحقايق يناجيك
ما أقدر على النسيان يا نور عيني = لو طالت الأيام ماني بناسيك
عايش على ذكرى قديم السنيني = أيام ما كانت عيوني تراعيك

خالد البيضاني الحربي

6- وفوق ذلك تكانه

وله في الغزل ايضا:

يفدا حبيبي من سكن بأرض لبنان = واللي سكن باريس وأرض الكنانه
واللي سكن لندن وسكان عمّان = والله ما يسوون مفصل بنانه
غروٍ بنا له داخل القلب مسكان = حتى تمكّن في خفوقي حنانه
قلبي معه يأهل الهوا وين ما كان = يتبع طريقه بالشقاء والليانه
ما شفت مثل الزين في كل الأوطان = عقل وجمال وفوق ذلك تكانه
أثقل إطراز اللبس ملبوس بإتقان = لكن جماله من وراء اللبس خانه
أستغفر اللي فارضٍ خمس الأركان = نور القمر لو غاب حل إبمكانه
سنه ثمان وعشر والعود ريان = العين من تنظر يزيد إمتحانه
يا ليتني ما شفتهم وسط الإسكان = وقامت تمايل كنها الخيزرانه
تمشي وخطوتها قصيره على شان = تقرير حسراتي تصفّح بيانه
فعلاً بعد ما شفتها صرت حيران = في ماقفي جوفي تزلزل كيانه
نويت أصارح صاحبي نور الأعيان = لاشك جونا أهله وقفّا إبشانه
قفّا وأنا قفيت مولع وندمان = قلبي خفق والعقل خل إتزانه
قمت أسترد الآه في كل الأحيان = مدري غلاها وش يصير اجنيانه
وسجّلت في بحر المحبين عنوان = وحملت حبي بالخفا والأمانه
والحب بين إثنين ما فيه كتمان = وأنا كتمته وأعترف بالإدانه
ياليتني صارحتها جهر واعلان = حتى يترجم ما يكنه إلسانه

خالد البيضاني الحربي

5- ترجمة شاعر

الشاعر خلف بن زويد بن خلف بن حطاب الرخيص السنجاري الشمري( 1260-1361هـ)، ولد ببادية الرخيص حول جبه سنة 1260 هـ تقريباً، وتوفي في حائل سنة 1361هـ 0
شاعر فذ، من جهابذة الشعر النبطي، وأكثرهم شهرة، يتميز شعره بجزالة الألفاظ ورصانة الوصف، له أشعار كثيرة في مختلف الأغراض، كالمدح، والحكم، والنصائح، والوصف 0

1- وراء الشط عبّار

يروى أن أحد الأمراء من الرشيد، عندما رأى الشاعر خلف أبا زويد سأله قائلاً: وين ربعك يا أبو زويد ؟ وربع أبي زويد الذين يسأله عنهم ابن رشيد، قومٌ من الرخيص من سنجاره من قبيلة شمر المعروفة، وقع بينهم وبين قومٍ آخرين من شمر أيضاً خلافٌ على مورد مياه، مما جعل ابن رشيد يغضب على الرخيص، ويلّع أطناب بيوتهم لهدمها تنكيلاً لهم،بلم يتحمّلوا الموقف، واعتبرواه إهانةً لهم، ونقصاً بحقهم، وأعتبروا ابن رشيد شطط بحكمه عليهم، ولم يعدل بينهم، على مراء من الملاء، فنزحوا إلى العراق 0 وعندما أصبحت جحافل جيوش الملك عبد العزيز آل سعود، تحقق الهدد من الانتصارات المتتالية، وأصبحت جيوش ابن رشيد تتقلّص، وتراجع إلى حائل، فكان بحاجةٍ إلى المدد والعون، فسأل الأمير الموجود حين ذلك أبا زويد السؤال السابق، فقال خلف أبو زويد قصيدةً رداً على سؤاله، منها هذه الأبيات:

ربعي كما دلوٍ خنب بَهْ ارشاها = ودلو الرواء ما ينسخي بَهْ للإعوار
ربعي إلى ركب المحاله ارشاها = ننطح بهم العدوان ونأخذبهم ثأر
راحو كما غيمٍ يحده هواها = علمي بهم ذكرو وراء الشط عبّار
كم ديرةٍ شربو شهاليل ماها = وأرض الخطر ما ياصله كود جبّار
يوم أن ابن علي يدوّر عماها = وابن الجرادي موقدٍ فتنة النار
حنا اربوعك يوم هي ما وراها = كيٍ على كبد العدو حاميٍ حار
إلى ما أنها وصلت إلى منتهاها = نركض لكم بالحيل ونسخي بالإسخار

الشاعر/ خلف أبو زويد الشمري

6- ترجمة شاعر

هو الشاعر سعود بن خلف بن مسيعيد بن حفر الجميلي، ولد سنة 1356هـ في بادية الحدقه، من سكان حفر الباطن 0
شاعر مجيد، متمكن من صياغة الشعرالشعبي في جميع أغراضه، له بهذا الديوان:

1- ونفسي قهرها

ونتي ونة اللي شاكيٍ من حريبه = يوم ثار المشوّك بس مجّة حمرها
عيني اللي من الوجلا تنثّر سريبه = من هوا اللي خذا روحي ونفسي قهرها
يا حياتي تراني ما معي ما ألتهي به = كل يومٍ وأنا عيني تنثر اعبرها
صابرٍ مل صبر ايوب فيما ابتلي به = بس اعد الليالي والعيون بسهرها
يا أشقر الراس ذنبي يالغضي وش تبي به = خف من الله وخل الروح تنقل خطرها
أنت غاية هوا قلبى وداه وطبيبه = وأنت غيرك عيوني ما دخل في نـظرها
عود موزٍ من الجاري تـهزّع رطيبه = يوم هدو عليه العين يمشي نـهرها
عنـز ريـمٍ تحايد من حذرها بريبه = شافت اللي عدا من قو لمحة بصرها
لاوحت مير ماجت عن مكان الضريبه = وأنتحت والمبنّدق ما يوثّق قدرها
وشمت الريح والمغرب تدانا مغيبه = حذرةٍ كل ما جاء واحدٍ ما قدرها
ورد مفلس وكل الليل يشمت نصيبه = وأغرب الليل والقمراء تدانا سفرها
مولعٍ بالهوا والقلب مني اغدي به = عيت الروح تجزي يوم ربي ومرها

الشاعر/ سعود بن حفر الجميلي

2- لهوا خاطرٍ له

خلّن لطيف الروح يشبع من النوم = وامشن بطوعه علكن فدوةٍ له
ترا الخوي بالوجه من غير مثلوم = عليه وصانا النبي بالأدله
اليوم مع باكر وبه ينقضي اللوم = ثمٍّ يوادعكم وينحر هلٍ له
أبو جديل أشقر على المتن ملموم = يشدا لشرطان الذهب يوم فلّه
والنهد مزبورٍ على الصدر مزموم = وامْشاهده يبري مرض كل عله
نقيم له بكر وعقبه مع اليوم = ومن حشمته نتبع هوا خاطرٍ له
حيث ان حبه بين الأضلاع ملحوم = هو رايزٍ نفسه وأنا عارفٍ له
واللي يبـي مثله من القدر محروم = يزعل عليّ لمّا أن يشوف الممله

الشاعر/ سعود بن حفر الجميلي

7- ترجمة شاعر

الشاعر سعود الوصي

هو الشاعر سعود بن محسن بن مطلق الوصّي، من الدهيم، من بني علي، من مسروح، من قبيلة حرب، ولد في قبة، سنة 1375هـ، من سكان قبة 0
شاعر مجيد، تطرّق بأشعاره إلى العديد من المواضيع، والمناسبات، بأسلوبٍ سهل الألفاظ، حسن التعبير، خالٍ من التكلّف، والتصنّع 0

1- لبيت الزين متعنّي

وللشاعر/سعود الوصّي، يداعب ابنه طلال:

يا ليتني يا طلال آصل مواصيلك = لا حذّفن البراقع ما يهابنـي
تعال أبى أبدي عليك السد وأمضي لك = حيث انك اجرى على اللي تـهتوي مني
لي شرط واحد عليك إلى انتحا سيلك = لا ادركت حبه تقول البيض حبني
من شأن احبك وفوق عيونـي اشيلك = واللي تبي يا طلال تحصّله مني
لكن أنا اخاف بكره يلتوي ذيلك = وتحذّر اللي مع الشارع يـمرني
تراقب جو المحبه لين يصفي لك = حتى تثنى على صيدتك متهنّي
لا تخلي العود يسعى في غرابيلك = ينصب لك الفخ ويحصّلك متثنّي
من أولٍ حروة المطبخ مداهيلك = واليوم اشوفك لبيت الزين متعنّي
وإلى ندهتك تجتهل من ينادي لك = منك استشكيت كل البيض عافنـي
الله يوفق دعا اللي يبي يدعي لك = والله يوفقك درب المسلك الفني

الشاعر/ سعود الوصّي الحربي

2- داخل فوادي

قصيدة غزلية، للشاعر/سعود الوصّي:

تقول بالخير قلت أهلين يا حصّه = يا اللي زرعتي بذيره داخل فوادي
وا حالي اللي عقب عرفتك منهصّه = لا عاد يومٍ عرفتك فيه لا عادي
عز الله أنك لتل القلب مختصّه = وبيديك لأهل الغرام اهجار وقيادي
يا عقد لؤلؤ ويا نيره ويا حصّه = يا ماس غالي جرى لي منك الانكادي
حتى الأديب الذي لا ينتقد نصه = لا ركّز الفكر بالتوصيف ما فادي
وش لون اعيش بسعاده بعد هالقصه = وأنا بقلبي يتركّز مثل الأوتادي
ما عمر قلبي يفز بشيء ما يخصه = يمكن تضيع البصيره معي وأفادي
وأصير مثل الذي شرب له سمٍ امتصه = الناس تدفن جميع ودفني افرادي

الشاعر/ سعود الوصّي الحربي

3- زاد احتراقه

وله هذه الأبيات يساجل بها الشاعر محمد الجويدي الحربي:

يابو حمود لخطك اليوم مشتاق = ساعة لفاني خاطري في طلاقه
يا مرحبا مليون وعداده اطباق = من خاطرٍ له بأحسن القيل طاقه
العلم له مغزا ومصدر ومدلاق = وأنته لنا درعٍ تضارس احلاقه
لعل ما تقصر يمينك وتنعاق = إلى بنيت البيت تكمل ارواقه
يصير له ظل وعن البرد مشراق = ولأهل النظر يلوق بأحسن لياقه
وسهمك يا فرز الوغاء يكسر الساق = سوءٍ على رعا الرها والنـزاقه
الهرج والله محرقٍ قلبي احراق = صبرت لين القلب زاد احتراقه
ناسٍ على العالم تشدّق تشداق = يرهمون الهرج ماله علاقه
طيبهم اللي كل ما خاطره ضاق = بعروض خلق الله غدا له نقاقه
عن لازمه دايـم يتملق تملاق = تقصر عن دروب الرياجيل ساقه
يا عل بطن أم الكباير لشقاق = ليه الضراوي ما تمرر مذاقه
عن لازمه دايـم يتملق تملاق = خطو الهبود اللي خبيثٍ نطاقه
ولا ألوم من جنّب طواريق همّاق = اللي على اللازم قويٍ وثاقه
حلاّل للصعبات مبهم ومغلاق = فتّال حلاّلٍ قويٍ عَمَاقه
وصلاة ربي عد مالاح برّاق = على النبي اللي عظيمه اخلاقه

سعود الوصّي الحربي

4- بين الحفيفين قاسي

قصيدة للشاعر/سعود الوصي الحربي، رداً وتضامناً مع قصيدة الشاعر/محمد الجويدي الحربي " وشرواه خاسي ":

بديت بذكر اللي خلق كل الأجناس = اللي بسط أرضٍ ورسّى مراسي
اللي خلق ناسٍ بعد ناس من ناس = ناس تروح ويطلع الكون ناسي
جتني بيوتٍ مذْرَبه مثل المواس = حاده وحدتني ابيوتٍ قواسي
من الشاعر اللي للصعيبات مدباس= مدباس ظلماء بالليالي المساسي
الشاعر اللي بالقسا مثل جساس = لا صار ما بين الحفيفين قاسي
أبو احمود ببحر الأشعار غطاس = أديب بالمعنى حكيمٍ مواسي
يوم المنافق حد موسه والأضراس = عليه صبيت الرصاص السلاسي
اللي عمل بين الأجاويد لولاس = كذّاب نمّام خبيثٍ اخلاسي
بعض الرجال ايقال له نذل واهلاس = اللي على الغايب يحد الضراسي
كم واحدٍ من سبته يوجس اوجاس = يضحك احجاجه مار قلبه نجاسي
والناس فيها اجناس من قبل ابن واس = إلى وقت نوح ودور برسيس ياسي
هذا وأنا ماني على الناس دبّاس = ولاني على الغايب بلوسٍ ادباسي
اسكت واجامل واترك الهرج لاباس = إلاّ إلى فرّ الهبود الملاسي
اطق حنكانه مثل طقة الكاس = بيدين ورعٍ طق كاسٍ بكاسي
جبت القلم والحبر واحضرت قرطاس = احضرت له فكري وحضرة احساسي
وفتلت ابيوتٍ مثل ما يفتل امراس = اطلع على العلياء واكب الخفاسي

5- على رؤوس الأوكار

وله هذه القصدة يسندها إلى الشاعر حوّاس الديري الحربي:

مبداي بالوالي عزيز الجلالي = منجي سفينة من غب الأحار
الواحد المعبود مرسي الجبالي = يعلم دبيب النمل في سر واجهار
ومن بعد هذا شفت شيءٍ محالي = في دبرته يرسل من الغيث الأمطار
علاّم ما بالكون محصي الرمالي = يعلم خفيات النوايا والأسرار
رب الملا علاّم كل الحوالي = وقتٍ علينا ضاع والإبصار
عن ما حدث واحترت به هالليالي = حتى أصبح البوّه على روس الأوكار
وأسألك يا حوّاس واسمع سوالي = أصبح يخاوي الشاه بفياضٍ أقفار
والذيب ماله هيبةٍ بالمفالي = وأصبح يفوز بالدور من كان هذّار
تغيرت دورات سود الليالي = حيثه على غرات الأجواد ثرثار
هذاك عله للخفاء والزوالي = يعل جنسه بيننا ماله أذكار
بين البشر كنّه بعالي التلالي = حيثك فهيمٍ بالمعاني وبيطار
وتدانت العالم ولا اهنا مجالي = شيءٍ شغل بالي وخلاه محتار

سعود الوصّي الحربي

نبدي شهاده

رد الشاعر/سليمان بن غزي بن حمد الغزي، على قصيدة الشاعر/صالح بن حمود الحربي:

اعداد ما تذرا الهبايب تراديد = وعداد ما أورق عشبـها في حـماده
يا مرحبا ترحيب من دون تحديد = على مدار الوقت واضح مزاده
تدوم للي ورّد القاف توريد = شاعر ولا يحتاج نبدي شهاده
معناه يشهد له بعلمٍ وتوكيد = ودق التحري فيه معنا السعاده
صالح على اسـمه شيّد القاف تشييد = زاد المعاني حكمةٍ باجتهاده
من لابةٍ وقت اللقا تفشل الكيد = كيد المعادي ل انتحو في طراده
حربٍ ولا يحتاج للعلم ترديد = لا جاء بيان الحق وقت اعتماده
وقتٍ مضا يوم المشاكل بلا قيد = وقت القصا وقت الشقا والنكاده
للسلم سلم وبالمتارس بواليد =وعلى ظهور الخيل بالفعل ساده
حربٍ لهم في قمة المجد تسنيد = كد قال ابن خربوش علمٍ وجاده
صرح بنوه وقام بأفعالهم يشيد = صرح له التاريخ يعطي الافاده
بين الأمم شامخ على الدوم ويزيد= من أول الدنيا يزيد اقتصاده
إلا اعتزو في عزوة المجد يا عبيد = بيديهم حل الأمر وهو انعقاده
حييت يا صالح ومسياركم عيد = عيدٍ مع العيدين جايز اعداده
وخيار ما ننهي به القول تخليد =صلو على اللي خص بأمر العباده

سليمان بن غزي الغزي

[center]

على رضخه

كنت أنا وزميلي شريف سمران المطيري مناوبين ذات يوم، فأنشأ شريف قصيدة، يخاطب بها زميلاً لنا يدعى دغيّم، غير موجود في ذلك الوقت لدينا، وليس بشاعر، وعندما أطلعت على قصيدة شريف قلت له من باب المداعبة، والتسلية، مارأيك في أن أقوم بالرد على قصيدتك هذه على لسان دغيّم؟ قال: تفضل رد، ما عندي مانع، فرديت على لسان دغيّم بالأبيات الآتية بعد قصيدة شريف، حيث قال شريف:

ابلشتنـي يا دغيّم باستعلاماتك = خـميتنـي بالجزاء ما ادري وش الطبخه
فيما مضى ما تسلّم واجبٍ فاتك = وصدّرت أوامر وتلبخ صاحبك لبخه
لاصار في صالحك كبرت ملفاتك = ولا صار فـي صالحي رضخه على رضخه
عز الله أنـي زعلت وكلمتي جاتك = وحجانك اللي على جبهتك منتفخه

شريف سمران المطيري

سلمٍ وعاده

أبيات للشاعر/صالح بن حمود الحربي، يهديها إلى الغزي أهل المنسف:

يا راكب اللي اليا مشى يطوي البيد = إليا حافه السوّاق غاية مراده
يسرح من الفيحا غداةٍ بتحديد = حزة بياض الشمس يجلي سواده
يلفي بنا دارٍ كما نايف الحيد = دار الصخا يوم القصا واشتداده
يا الله من مدك تـمد الأجاويد = اللي لهم بالطيب سلمٍ وعاده
يوم السنين الجرد وملافح جويريد = الضيف كنّه في ليالي عياده
ومزعفر الفنجال يبرا نما الغيد = في مجلسٍ بالقيظ ينعش براده
مع حايلٍ ترما ولا فيه تصديد = وقولة هلا حييت فوقه زياده
والجود بأهل الجود ما قيل تقليد = من قبلنا قال الزغيبي وشاده
أعني بـها الغزي ونعم الأواليد = سكّانة المنسف بعالي نفاده
والله مالي مقصدٍ غير تـمجيد = والجود لأهل الجود حق وشهاده
من لابةٍ تأخذ على الخصم وتزيد = عوق الخصيم اللي طغا به عناده
يوم النـمش مثل المحوص المواريد = حريبهم ما ذاق لذّة رقاده
أولاد زايد من غير عدٍ وتفنيد = وإن قرّبو لخشم الفتيله زناده
تحية الحربي لكم دون تعديد = مع خنّة العنبر ونافخ زباده
وصلو على اللي جدد الدين تجديد = دين الولي جدّد مناره وعاده
= الشاعر/ صالح بن حمود الحربي

يلقا الوفاده

رد الشاعر/عبد الله بن عبد العزيز الغزي، على قصيدة الشاعر/صالح بن حمود الحربي ص 42:

طير السعد غرد من الشوق تغريد = عقب الهواء ما هز شعرة فواده
يكفخ كما حرٍ زوا كفه القيد = شاف الضريبه قبل طلعة هداده
يثني من الترحيب جمعٍ وتفريد = مثل الذهب في جيد راع القلاده
احلى من ألبان أمهات المفاريد = في خايعٍ عله من الوسم غاده
ترحيب وافي حسب سلم التقاليد = من قدم الجزلات يلقا الوفاده
حييت يامنتب قرومٍ اماجيد = خطلان الأيدي كاسبين الرياده
يا شاعرٍ شيد معانيه تشييد = هام الطويله فوق صهوة جواده
يفتل رموز القول فتلٍ بتوكيد = على الحرير الحر معناه قاده
من سربةٍ عند المواجه صناديد = حرابة العايل بلاه وهجاده
حربٍ إلى وردت جموعٍ عراجيد = ميرادهم معروف يرهب اطراده
إن جاء نـهارٍ فيه كرٍ وتسنيد = على ضروس الحرب فيهم جلاده
إلى اقبلت للخيل خيلٍ مطاريد = كم شيخ قومٍ قصرو له قياده
أهل الفعول الوافيات المحاميد = المجد شدو في سنامه اشداده
الهم مع التاريخ وقفه وتخليد = حازو على كاس الظفر والسياده
هذا ولا أرد هل الطيب تجريد = كلٍ خذا من هبة الريح زاده
والخاتـمه ما هل عيدٍ وراء عيد = صلو على الهادي لنهج السعاده
= الشاعر/ عبد الله بن عبد العزيز الغزي

الشاعر/ عبد الله بن خلوي

12- ترجمة شاعر

هو الشاعر عبد الله بن عبد الهادي بن علي بن خلوي1388 - 0000هـ)، من الجحوش، من بني علي، من مسروح، من قبيلة حرب، ولد في قبة سنة 1388هـ 0
شاعر مجيد، قال العديد من القصائد الجميلة، في جميع أغراض الشعر، منها:

1- تواصيفك على لساني

قصيدة غزلية، للشاعر/عبد الله بن عبد الهادي بن خلوي العلوي الحربي:

هلا في وجهك الباهي هلا بالمسك والريـحان = هلا بالجوهر النادر هلا في غال الأثـمانـي
هلا في نسـمة الغربـي تداعب خضرة الوديان = هلا بالشمس بعد الغيم تدفئ بارد أحضانـي
بشوفك طابت أيامي وحزنـي ضيّع العنوان = سرى في ليلةٍ خرساء يدوّر واحدٍ ثانـي
بعيني زايدٍ زينك كما لوحه بيد فنّان = من الريشه يصممها وتواصيفك على لسانـي
على كيفي ومطلوبـي خلقك الله عزيز الشأن = هواك محققٍ حلمي وقربك رافعٍ شأنـي
رويت بحبك الطاهر وأحس أنـي بعد عطشان = وأنا خوفـي من الدنيا تقلّب كف ميزانـي
ويصبح منهى القصه محطاتٍ من الأحزان = عسى الله يشفى المبلي بـها ويـجازي الجانـي
ولا يبقى من الذكرى سواء ترديد كان وكان = وتبقى اللوحه الحلوه خطوطٍما لها ألوانـي
روايه غامضه تكتب وتحفظ في جميع ألسان = ويكتب بآخر القصه بطلها صابه اجنانـي
=الشاعر/ عبد الله بن خلوي الحربي

2- لردة الهرج معروف

له هذه القصيدة يسندها إلى الشاعر عياد بن بسيس الحربي:

البارحه قلبي تأثّر بالأوقاف = وغمضت من نارٍ على الكبد ما اشوف
وقمت اتفكر واتمعن بما طاف = وأونست نرٍ حرها يحرق الجوف
حكم القدر قرر حياتي بالأرياف = وخلاني أمشي بالخلا تقل مكتوف
لاني بخوّافٍ ولا ابوي خوّاف = ولا بخوالي واحدٍ يلحقه خوف
ما القضيه كلها صارت أهداف = أهداف وساسهما هي حربوسيوف
تمشي بنا الدنيامثل سرعة الهاف = وحنا نبيها لا مشت تقل شاحوف
خل الغبي يقعد على حد الأكتاف = ولا احدٍ بمن يلقا على الدرب مكلوف
من أولٍ نبي الحقايق والإنصاف = واليوم ما شفنا من الحق منصوف
هرج النمايـم مسرفينٍ به اسراف = وأصبح يقال لقايل الحق ملقوف
وبالله من يوصل كلامي مع القاف = خطٍ به العنوان جاهز ومظروف
لأبو فهد جيئه وهرجه وميقاف = وإن ما حصل ما يكفي الهرج معروف
يا ابو فهد جاني من أصحابي اخلاف = وقعدت أشوف لردة الهرج معروف
هذي علومي وأنت بالهرج عرّاف = يا ابو فهد ماهي تماثيل واحروف
من أولٍ حالي زمرّد بالأصداف = واليوم أنا حالي من الهم مصدوف
=الشاعر/ عبد الله بن خلوي الحربي

3- ساقو مهرها

وله هذه الأبيات الغزلية، موجهها إلى الشاعر مرزوق الفهيدي الحربي:

يامل قلبٍ لاعه الهم والتاع = لا قلت هانت زاد حظي كدرها
حالي دمرها الهم منشين الأوضاع = حتى عيوني قم يقصر نظرها
عزي لمن جاه الدهر عقب مرباع = وأصبح يشوف الحال يدني خطرها
على فتاةٍ عيبها زين الأطباع = راحت علي وصاب قلبي خبرها
يامهرةٍ حبيتها قبل تنباع = صعوب ما عسفت ولا أحدٍ قدرها
راحت ضحيه للمصالح والأطماع = حسبي على اللي يوم عيت نـهرها
يعل واليها إلى أرتاح يرتاع = من شوف ماله تشتعل به اسعرها
غير الصمم ما غير يشّر بالأصباع = والشمس تشرق ما يـميز سفرها
وعسا العجوز اللي رضت له بالأتباع = تـمرض ويقزيـها المرض في نحرها
يا ابو فهد يا مسندي وين الاسناع = حال الطمع دون السلوم ودمرها
ضاع الأمل واليوم صبري معه ضاع = حبيبتي راحت وساقو مهرها
= الشاعر/ عبد الله بن خلوي الحربي

13- ترجمة شاعر

الشاعر عبيد بن عبد الله بن داموك الداموك الرشيدي، ولد في مراغان من قرى حائل، سنة 1379هـ 0
وهو شاعر مجيد، يتميز شعره بحسن الاختيار، جزالة الألفاظ، وعمق المعاني، ودقة الملاحظة، ورصد، الأحداث، وسلاسة التعبير 0
له عدة مشاركات شعرية في بعض وسائل الاعلام المهتمة بالتراث والأدب الشعبي، له أشعار كثيرة في جميع أغراض الشعر، من نصح، وحكم، ومناسبات، ومساجلات، وغيرها، وقد جمع أشعاره بديوانٍ جاهزٍ للطبع، إلا أنه لم يطبع حتى الآن 0

1- ما تطمع في مجاورها

للشاعر عبيد بن عبد الله الداموك الرشيدي، هذه القصدة قالها بمناسبة احتلال الغزو العراقي الغاشم، لدولة الكويت، عام 1410هـ – الموافق عام 199م:

الله ثـم الملك والدين وبلادي = حقيقةٍ بالمثايل قال شاعرها
هذا نبا الجيش من ضباط وأفرادي = والروح دون الوطن ما احدٍ بذاخرها
اخلاصهم للملك من عصر الأجدادي = فعايلٍ يشهد الماضي لحاضرها
قوه تقف للعداء في كل مرصادي = من فهد تستقبل القوات أوامرها
حنا هل الحرب لا جاء حرب واجهادي = من طمع فينا يبي يشكي خسايرها
إن كان صدام غرّه فكره الغادي= وطمع بدارٍ ما تطمع في مجاورها
يبشر بنارٍ تبي توقد توقادي= بجنوده اللي على جاره مكثرها
العاصفه ترجم البصره وبغدادي = تـمطر بوبل القذايف من محاورها
وجيشه حصرناه حصر وصار منصادي = بالخطه اللي يبي التاريخ يذكرها
نصر الخليج وهزيـمة قوم حمادي = والزره الغاشـمه واللي يناصرها
حنا هل الدين واحما البيت يالغادي = وإلاّ أنت خارج عن الملّه وناشرها
صدقني انك غشيم بسنة الهادي = لا تفهم آية قرآن ولا تفسرها
=الشاعر/ عبيد الداموك الرشيدي

2- للقائد فهد

وله هذه القصدة، قالها بمناسبة حلول عيد الفطر المبارك ، لعام 411هـ، ألقاها خلال الحفل الذي اقامته قيادة المنطقة الشمالية، بـمدينة الملك خالد العسكرية، بحفر الباطن، بهذه المناسبة:

ابدأ بسم الله رب العالمين = وأرفع التبريك للقائد فهد
الأسد اللي حما ذاك العرين = من جميع الطامعين أهل الحسد
انتصاراته على طول السنين = يكتب التاريخ عنها للأبد
دام عزه للعرب والمسلمين = خادم البيتين حلال العقد
بسمي وبسم الجنود المخلصين = له نزف التهنيه يوم السعد
يوم نصر الفهد ضد الطامعين = وعيدنا اللي صار عيدينٍ جدد
يا ملكنا كل جيشك طيبين = ما يهاب الموت في يوم النكد
ما يهابون الحواجز والكمين = لا أمرت أمرك يطاع ويعتـمد
ويش لو جيش المعادي زايدين = عن عددنا ما علينا من العدد
غزوة الخفجي تعلمهم اسنين = فعلنا كلٍ حكا فيه وشهد
والكويت محرره في ليلتين = والعلم مرفوع من فوق العمد
والعدو أسراء وبعض مشردين = وأنتصر جند الفهد عاش الفهد
= الشاعر/ عبيد الداموك الرشيدي

3- نصايح للسواقين

وله هذه القصدة، قالها بمناسبة أسبوع المرور، لدول مجلس التعاون الخليجي، لعام 1409هـ

:

بسم الله أبدأ بالقول = كلامٍ صدق ومعقول
وبأسبوع المرور أقول = نصايح للسواقين
أول شيء أبدأ التحيه = مني للمحفل هديه
باسم الشرطه العسكريه = نرحب بالمدعوين
وثاني شيء أبدأ الكلام = مع مزيد الاحترام
وابا أسجل بالأقلام = وأوصّي بالقوانين
يا سواق احذر لا تسرع = وأنت بطريقك توقع
لا تطش الغتره وتصقع = وتـمشي ممشا المجانين
السرعه ما فيها فن = لا تطيع ابليس وتنجن
القياه ذوق وفن = العن ابليس اللعين
ترى السياره حديده = لا تقول السفره بعيده
وتسرع والابنص تزيده = وتقول ابا آصل هالحين
وتجري لك بعض الجواري = تصبح ضحية كباري
وأنت اللي سببت الجاري = ويـمكن غيرك مخطيين
أويـمكن لو أنت اخطيت = تبلش فيما لا احتريت
ما يفيدك قولة ياليت = أو الناس الغلطانين
أنا ابغا تسلم خطأهم = قبل لا تبلش وإياهم
ترى بعدك عن عجفاهم = عيد ثالث للعيدين
على ما قال العلاّمه = بالتأني السلامه
وحق المستعجل ندامه = هذا الكلام الثمين
لو شفت الشارع وسيع = وقالو لك هذا السريع
لاتطيع أرياك تضيع = وتحسب أنه للعجلين
الدوله ما قصرت = كم من اجلك خسرت
وكم طريقٍ عمّرت = وفيه تسوق الملايين
كل الطرق الصحراويه = صارت مزدوجه وفنيه
للوافد والأهليه = سوت طرقٍ للماشين
حطت لوحات ارشادات = على كل المنعطفات
والسرعه بالمسافات = يحددها فنيين
وراء التحديد المرور = يردع خطايا المغرور
بالرادار وبالعبور =يراقب كل السيدين
وكل الهدف والمقصود =منع الحوادث لا تزود
والسلامه أكبر فود =وهي أهداف المسئولين
لا تزعل لو خالفوك = وبالقسيمه سجلوك
أو اتحسهم عادوك =تراهم هم المقدين
ترى جزاهم تذير =قدام الصاير يصير
يبغونك بأثناء المسير =يـمشي ممشا المنتظمين
هم من شانك يتعبون =وبالليالي يسهرون
واللي هم يستحقون =قولتنا الهم مشكورين
والله ويكم ياقانا =ومن الحوادث يحمانا
وأسأل المولى عسانا =من الناس المهتدين
واختام المعنى نقول =صلى الله على الرسول
وبأسوع المرور أقول =نصايح للسواقين
=الشاعر/ عبيد الداموك الرشيدي

4- شيمة ابن القبيله

وله هذه الأبيات، التي تعبر عن طموحه، وغايته في الشخوص إلى ذروة المعاني المحمودة:

دربٍ طويل ويمّة السير بتله = لا خارطه لا بوصله لا دليله
ماشيه وأنا ما طلبت النعت له = جيت الكثير ولا بقي إلا قليله
لا ما يصير اغديه والناس تصله = لا ما تصير أفكارهم مستحيله
دربٍ وصل له فالح الرأي أبا اصله = ممساي ممساه ومقيلي مقيله
عبيد مثل الناس والناس مثله = لي مثلهم فكر وبصيره وحيله
أنا بدويٍ عزوته زينة إبله = وعن الكديش اختار بنت الأصيله
أخجل لا أقول أعلوم ما هي بجزله = أسير سلم وشيمة ابن القبيله
=الشاعر/ عبيد الداموك الرشيدي

5- وعليت واطي

وله حول النظر إلى اعتبار الناس، والمقايسة بينهم، بحسب الدين، والأخلاق الفاضلة، والعادات النبيلة، لا بحس بالأموال، والمظاهر المفخفخة:

وين أحسن الذكر ووين المحبين = يا وقت ليه تكدر الإنبساطي
ليه الفرح فيه العوض دمعة العين = وليه الكسل يرخي العضود النشاطي
وليه الفراق وليه بعد الموالين = اسرعت باللي كنت قبل امتباطي
ويا وقت ليه اللي مضا عكس هالحين = في كل شيء صار فيك انحطاطي
أول تمنيني كنوز وملايين = واليوم تسرق ذخري الاحتياطي
كم لي وأنا فيك أوفي الدين بالدين = واعز نفسي ما ألتفت للسقاطي
واثرك مثل السيف تضرب بحدين = خوفتني وأنا قبل كنت ساطي
بالمال طوّرت الرجال الرديين = وسحبت من تحت الفقير البساطي
وبالفقر ذللت أهل الطيب والدين = نزّلت للعالي وعليت واطي
أقشر وقمت اتخالط الزين والشين = غديت جمره في سبوت المواطي
اشكيك للي كوّن آدم من الطين = وفرض على خلقه عبور السراطي
انه يبدل عسر الايام باللين = وهو الكريـم أخير رازق وعاطي
= الشاعر/ عبيد الداموك الرشيدي

من شد حل وكل عجلان هدّا= ومن فرح حزن ومن ضَحَك هَلْ عبرات
الناس راعي قرصها ما تغدا=أجل غداه وقبلما ياكله مات
الطرقي انكف والزمان اجرهدا=ومن حظ وارث صار جمع الريالات
الموت ما يرضي بالإنسان مِدّا= والقبر ما به غير حسنه وسيات
والناس فيها عالمٍ ما تخدا=المال لأجله يجّلون الصلوات
نسو رصيدٍ عنه ماشيء سدا=أي والله أن نفوس ناسه ثريات
أداء الفروض ومصحفٍ ينتبدا=حفظه يحفظ النفس عن كل هفوات
للجهل حد وماش للعلم حدا=والتجربه للشيء برهان واثبات
ياما هقيت بكم رفيقٍ وصدا=وياما احتملت من الموالي خطيات
وياما قصرت الرجل وازريت امدا=من حيرتي حول أربع الاتجاهات
أخاف أسيّر يـم مَنْ لا يودا=ويحط بالمسيار هرجه وقالات
وأنا ما نفسي تقبل اللي يصدا=ولا تقبل اللي فيه نـمّه وشكات
كم مجلسٍ عنه أشتهيت المصدا=إليا أجتمع فيه امتهزيء وشمات
=الشاعر/ عبيد الداموك الرشيدي

7- تطلع على أنسابه

وله هذه القصيدة، يسندها إلى مصلح الداموك الرشيدي:

دن الونيت اشتهت عيني على المسرا = ما جاز لي مرقدٍ بأطراف صبّابه
سولف وغن القصيد وسامر القمرا = والخد طوله معي لا تحسب احسابه
أنا رفيق السهر والليله الغدرا = وشعرٍ إليا ضقت اغني واتلهابه
أحب شوف الربيع ومنظر العفرا = بالموقع اللي به الأمطار سكابه
ما بين عربان لا تكتب ولا تقرا = بدوٍ تربو ما بين الضلع والغابه
ناسٍ لعين المسيّر شوفهم بشرا = أرداهم اللي لا شاف الضيف حيابه
غناة الأنفس بـهم لو انهم فقرا = للضيف تذبح خروفٍ زان مجلابه
يا كثر حبي لهاك الربع والصحرا = ومنط رجمٍ يشوق القلب مرقابه
يا زين منـزالهم بالديره القفرا = ما بأرضهم غير جرة صيد وذيابه
عصير يا زين مجلسهم على الصفرا = الدله اللي تنسي الجسم لأتعابه
برفةٍ وسطها النمات ما تطرا = كلٍ إليا من هرج ودك توحابه
هذا منايه يا مصلح وأنت فيّ ادرا = يا بن عبد الله يا عز اللي تعزوابه
يفداك خبلٍ خسيس ونيته قشرا = اللي إليا غاب ابن عمه تـهزابه
بالفكر ما يفرق الشقحا من السمرا = وبالناس ما يـميز الأعداء من أصحابه
هذار مجلسٍ ولا سمع الخبر هذرا = والشين يفرح إليا عدوه بأقرابه
لأبوه لأبو جميع اعلومه النكرا = ولأبو من الناس من ياقف على بابه
بيته كما العوشزه لا ضل لا مذرا = إليا دخلته ما غير اهواش وطلابه
تسمع صياح البزور ولجة العذرا = تقول معرض شريطيه وجلابه
وش لون هذا على عيب البشر يزرا = هو يحسب أنه بعيبه ما احدٍ عابه
عزي لمن جاء خطيب لبنته الشقرا = بكره ولدها يجي مثله ويبلابه
لن الوراثه مرض معدي ولا يبرا = والرجل ذريته تطلع على أنسابه
وين أنت يا مميز الصغرا من الكبرا = لا زلت وإلا بلعك القبر وترابه
أرفع مناسب ولدك وطرف العجرا = أن شفت عِشقه لبنت اللاش واللابه
= الشاعر/ عبيد الداموك الرشيدي

14- ترجمة شاعر

هو الشاعر عذال بن عايد بن هذال العميري الأسلمي الشمري ، من مواليد حائل سنة 1382هـ 0
يتميز شعره بجودة الصياغة، ودقة المضامين، وشيء من سعة المعرفة، والإطلاع، تطرق بأشعاره إلى العديد من المواضيع، والمناسبات، وشارك ببعضٍ من قصائده، في بعض الجرائد ، والمجلات المحلية، والخليجية، وغيرها من وسائل الاعلام الأخرى، التي لها اهتمام في الأدب الشعبي 0
له بهذا الديوان، الأبيات الآتية، وجهها إليّ شكراً على إهدائي إيّاه نسخةً من ديواني " المجموعة الظريفة من نوادر الأشعار النبطية والروايات الطريفة ":

1- ما يبذله من جهوده

تحيه وتقدير منا لنافل = وشكرٍ على ما يبذله من جهوده
ديوانكم جاني بالأمجاد حافل = وقريت ماجاء واحتوا في بنوده
تشفق على تراثنا ولا أنت غافل = ودوّنت تأريخ السلف من فهوده
دوّنت للي يحتمون القوافل = اللي لهم في سوق الأمجاد جوده
جزاك خير اللي للأرزاق كافل = صفتك صفةٍ بالرجال امحموده
ومن راد يرقا للعلا والنوافل = يصبر ولو شاف التعب في صعوده
وإلاّ الردي دايـم ودربه امسافل = ينـزل مع الوادي ويترك سنوده
= الشاعر/ عذال العميري الشمري

15- ترجمة شاعر

هو الشاعر عموش بن زنيوط العمري الحربي 0

1- طلعة الشمس ماشي

يا حش قلبي بين الأضلاع حشا = حش المشوّط للشويط الهشاشي
عوده ليان وناعمٍ عقب رشا = عجل انصرافه لو دويبه يناشي
على عشيرٍ خش له في مخشا = أمسا بليل وطلعة الشمس ماشي
القابله له بالأبيتر معشا = وهذيك يمسي في خشوم الرياشي
ما يلحقه يا كود حيلٍ تنشا = بنات عرماسٍ بعيد المعاشي
إلى أونسن هظّ العصا لو تـهشا = راحن يعبطن السهل والعفاشي
أولج لي المذهوب بالكبد غشا = ولا ينفع المسجون حلو المعاشي
أبو انـهودٍ كنها البيض نشّا = محفيهن الثوب الحمر بالنواشي
بالورد والريحان راسه يرشا = وينسف على بيض الترايب غواشي
=الشاعر/ عموش بن زنيوط الحربي

2- حسير الضماير

=وله:
أعوي عواء ذيبٍ تعاوا جنوبه = ذيبٍ عوا همٍ من الجوع غاير
وإلى تهضّم يجذب اعواه دوبه = يونس من الجوع الملاطف عزاير
عودٍ بتال العمر جت له عقوبه = عودٍ قضا لحقن عليه الدواير
على عشيرٍ يا عوض غرّبوبه = تتلي ظعون مدلهين الفطاير
تتلي معديّة الحريب انتحوبه = لا ثار عج الخيل عند العشاير
دنّو لها من زمل أبوها ركوبه = مورّد النسنوس ناب الفقاير
خزامه من الجوخ الحمر نقشوبه = ومفصلٍ باللون بين المراير
اقفو عليها عقب ما قرّبوبه = وأنا من الفرقاء حسير الضماير
يا من يبشرني يقول اقبلوبه = واجزاه بالمعروف واعطي البشاير
يا ليت ما يوجد سميه بنوبه = ماطرّه الشرقي لغرب الجزاير
أول عذابي يوم هم صوّتوبه = ينهب عراوي القلب مثل السعاير
=الشاعر/ عموش بن زنيوط العمري

16- ترجمة شاعر

الشاعر عياد البسيس

هو الشاعر عياد بن فائز بن فرّاج البسيس، من الكتمة، من بني علي، من مسروح، من قبيلة حرب، من مواليد قبة، سنة 1384هـ، حصل على الثانوية التجارية سنة 1408هـ، ألتحق بالشئون الصحية في حفر الباطن ، سنة 1409هـ ، وبعد مضي أربع سنوات على تعيينه أنتقل إلى الشئون الصحية في القصيم 0
شاعر مجيد، وابن شاعر، فوالده هو الشاعرفائز، راجع ص 74من هذا الديوان 0 يتميز شعره بجودة السبك، ولطف التعبير، له في هذا الديوان، القصائد الآتية :

1- بالجنان الفضيه

وللشاعر/عيّاد البسيس الحربي، هذه المرثيّة، يرثي فيها شقيقه المرحوم/حسين بن فايز البسيس الحربي، الذي وافته المنية، وهو في ريعان شبابه، وكان يرحمه الله قدوة حسنة في الدين، والاستقامة، والأخلاق الفاضلة، وفي أفعال الخير، والبر:

وا اخويه اللي ما تعدد سجاياه = ليته سلم واللي حصل فيه فيّه
ويا ليتني سديت قبره ولا جاه = وليت التراب اللي تهايل عليه
أنا فدا روحه وحالي فداياه = ليتي قبل ما ابكيه باكٍ عليه
يا لوعتي يا حسرتي عقب فرقاه = جرحٍ نجيض وعشرة اجروح فيّه
ألطف بنا يا الله يا الله يا الله = واجبر عزا أمي يا جزيل العطيه
وأبويه اللي غاديٍ له امناداه = يا حسين وين احسين أبطى عليّه
واجبر عزا ورعٍ بكى لا تباطاه = يبكي يبي شوف الأبو والهديه
ما يدري أن الموت بأبوه فاجأه = بأول شبابه وردوه المنيه
الله يعاقب من بلاه وتبلواه = تشابروه أهل النفوس الرديه
شهب العيون أهل الحسد والمحاباه = سهاجة الواجب حمير القريه
لو مالهم ما ينحصي لو حسبناه = اعيونهم في غيرهم لوذعيه
ما يشكر النعمه ويسجد لمولاه = ولا يقتنع بالرزق روحه شقيه
عينٍ على غيره وعينٍ لمجناه = لا يستريح ولا حياته هنيه
نفسه امكلفةٍ كلافه بدنياه = والله مسيرها على كل نيه
الله يلوع اللي فجاني بفرقاه = لوعه بأثر لوعه صباح وعشيه
حتى يذوق اللي نذوقه ونلقاه = طالبك يا المعبود رب البريه
بأغلى ضناه ليا أصبح الصبح ينعاه = بيضة عقم واتلا سلايل ذويه
الله يلوعه لوع بأقرب دناياه = احسين ما عمره سعى بالأذيه
من طلعته في سكة الخير ممشاه = الدين والدنيا جمعهن سويه
علم وصخا وأخلاق نهجه ومبداه = وله ربعةٍ للي حواله رديه
تنفق يمينه ما درت عنه يسراه = وكفه لفعل الخير دايـم نديه
والعمر دَين وراعي الدَين يقفاه = لا بد للمخلوق ذوق المنيه
لكن مثل ما قلت بأوله وأتلاه = الله يعوضه بالجنان الفضيه
وكلٍ يبي يلقى كتابه بملفاه = يمين وإلاّ يسار فعله نديه
وصلاة ربي عدن مزنٍ نثر ماه = على شفيع الخلق طاها نبيه
= الشاعر/ عياد البسيس الحربي

2- الأمن للحفر عاد

الله يسقي داركم يا ابو بادي = من مدلهمٍ تالي الليل ينقاد
ينشأ من القبله ويقداه قادي = للديره اللي كل سكانها أجواد
ديرة حمول الخيل يوم الطرادي = في صفهم يرعا الدبش وين ما قاد
حامينها بمصقلات الهنادي = بايدين صبيانٍ على الموت ورّاد
كم خفرةٍ كد لبسوها الحدادي = وكم والدةٍ تنظر ولدها ولا عاد
خلّوه ربعي طايحٍ بالحمادي = وصلوه بدياره على سرج واشداد
قلته وأنا ما عاد ليه اقعادي = ما من إجازه والأمن للحفر عاد
= الشاعر/ عياد البسيس الحربي

3- الفارغه خلها تطوف

حي الجواب اللي لفاني مع القاف = عداد ما ينبت نباتٍ بقفقوف
وعداد ما يـمطر على الخد هتّاف = نوٍ تقافا ما طره وسم وصيوف
باللي شكا لي واشتكا يطلب اسعاف = والله ما ارسل له معاذير واحلوف
مَنْ يسند الشكوا علىناسِ اضعاف = ولا تنبغي فزعة مسكين واضعوف
ومن لا فزع لك ساعة الضيق ينعاف = وقت الرخا جعله بتسعين هذلوف
لابأس يااللي شاف بالعين ما عاف = أرسل عليّ القاف من لاهب الجوف
أرسل عليّ أبيات جزلات وانظاف = أبيات عنهن ناقص الحرف محذوف
حكمه وواقع ما تكلّف تكلاّف = وأكبر دليل أن مفرداته بها نوف
أونست قلبي بين الأضلاع ينلاف = لوفة غصونٍ لافها الظهر عاصوف
حيث أن قلبي له تجارب وميقاف = معهم ومع ناسٍ تحراهم اصفوف
ناسٍ عليها لعنة النون والكاف = تطرب إلى طقو على الدف بكفوف
كد ذوقوني كاس من كل الأصناف = تفننو بي يا ابو هادي وأنا أشوف
والله لو يكشف على القلب كشّاف = يا ثومته كنه يطفا بها قطوف
وأنته وأنا نشكي وبه غيرنا آلاف = كد ذوقوهم يا ابو سلطان أصنوف
ناسٍ على هرج القفا تـهرف اهراف = مثل الكلاب اللي تنابح وراء الطوف
ياما تخطرنّا ثقيلات واخفاف = حذفة حصا بيدين عضبان واشتوف
وتراه ما يلحقك في نفسك اخلاف = لا تلتفت للفارغه خلها تطوف
والحر دايـم ماكره راس مشراف = والغار مسكان الجراذي وأبا العوف
وترى التواضع بعض الأحيان ينعاف = يرجّع الرجال من صدر لردوف
والناس صنفها على عدة أصناف = مثل الثياب اللي بها السلك والصوف
ناسٍ تعاملها على قدر الأشراف = خطو الرفيق اللي به القدر مخلوف
وناسٍ تجاملها وتبدي لها عياف = وناسٍ تطق بوجهها البغض مكشوف
وشربك بجهدك جغمتينٍ بـمغراف = ألذ من دلوٍ يجيء لك بـمعروف
وبيتٍ مقورن من حلالك بالأرياف = أخير من قصرٍ به الريش منتوف
وأقبل سلامي عد من حج واطّاف = ولو كان غيرك قلت ماني بـمكلوف
= الشاعر/ عياد البسيس الحربي

17- ترجمة شاعر

هو الشاعر فايز بن فرّاج بن لافي البسيس(1326 - 1420هـ)، انظر ديوانه من هذا المنتدى 0

الشاعر فهد السبيعي

18- ترجمة شاعر

الشاعر فهد بن محمد بن عياد السبيعي، من المراوين، من مزينة، من بني سالم، من قبيلة حرب، ولد في ضواحي قبة، سنة 1362هـ، وهو من سكان قبة، وشعرائها البارزين 0
شاعر مجيد، له طول باع في جميع أغراض الشعر، يتميز شعره ببديع التعبير، والاعتزاز بالنفس، وحسن وحسن الاعتذار 0

1- ما هقي به لقي به

له هذه القصيدة عرضها على الشيخ نايف بن عبد المحسن الفرم، أمير اللواء الثاني والعشرين، في الحرس الوطني، سنة 1393هـ:

يا راكب اللي لا مشا يوهف أوهاف = أوهاف شيـهانٍ نزع من جذيبه
مكلّفٍ مما يعوزه وهو هاف = مجرباتٍ له فعولٍ عجيبه
ويحمل سلام عد من حج واطّاف = وعداد ما دار العمود بصليبه
ويلفي على سيد الرجال أبو نوّاف = أميرنا اللي ما هقي به لقي به
حرٍ شجيع ومن عريبينٍ أشراف = وفعل الفخر دايـم يجي من نصيبه
هو درعنا الضافي إلى خاف من خاف = كل الرجال الطيبه تقتدي به
من عقبه جعله لجناتٍ ألفاف = بدر الظلام اللي غدا في مغيبه
اللي اشتهر صيته من الكاف للكاف = حاش الفخر بأول شبابه وشيبه
اقول لي قولٍ براهينه تشاف = ماني خطاة اللي الهدف ما يصيبه
قلته وأنا كني على جال ميـهاف = يومي بي أوماي الهبوب بعسيبه
لولا الطلب والدين ما عندي اخلاف = مطلوب والمطلوب حاله تعيبه
وأنتم كما هدّاج في ماضي الأسلاف = يلقا الرواء سرحه بساقة عزيبه
= الشاعر/ فهد السبيعي الحربي

2- بين بايع وشاري

له هذه القصيدة مساهمة منه لغيره من الشعراء، في التصدي والحد من ظاهرة غلاء المهور:

بديت بسم اللي له الكون يندار = وأبديت مكنون الضماير اجباري
غصبٍ عليّ أبديت ما أخفن الأسرار = لو ما تعودنا لكثر الهذاري
ونشّدت ويش أسباب توقيف الأمطار = قالو:ذنوب الناس،قلت:إيه داري
كيف البنات يبيعن بيع سمسار = راحن بضايع بين بايع وشاري
باعوهن الجشعين بأطوال الأسعار = لا باع واحد باع الآخر يـماري
يعل ما يبقا للأنذال ديّار = حازو على ذنْبٍ يـهز الكباري
من باع بنته قال أنا الوالد البار = وفلوس بنته مصرفٍ للطواري
يـهجر وينجر ويتعرض للأخطار = ويرجم إلى جا له مع الناس طاري
ويقْبَل مسبَة شاعرٍ ضمن شعّار = جازوه عن جيلٍ غزاهم اجهاري
ننشر سرايرهم مع العار والمار = عبر الاذاع بالمدن والصحاري
هذا جزاء من لايعرف قيمة العار = قدره مثل نزهان ذيخ المذاري
تكفون يا ربعي هل العز والكار = إلى متى تـمشون في مخ إداري
شبابنا مع خط الأجناب عبّار = وإلى أخذو نسوان راحو وقاري
من شب ناره بالدجا جته الأخبار = ومحمد ولّعها وأنا جيت ساري
توافدو للشعر وافين الأشبار = اليوم يقرا شعرهم كل قاري
الله جعلنا للردي كسر تعبار = وسوءٍ على اللي بالخطأ ما يداري
من غاص غبات البحر جاب الأمحار = يـمكن لنا يصدر به أمرٍ وزاري
هذي مبالغ طايله ما هي أمهار = يبقا لها بوجيه أهلها مواري
تم الكلام اللي مثل قطف الأثمار = يـمشي على صوب الهدف ما يباري
=الشاعر/ فهد السبيعي الحربي

3- يعرّط ببده

له رداً على قصيدة لمرزوق الفهيدي الحربي:

يا مرحبا مني وتحيه بترحيب = بـمشذّرٍ مضمون من كل عِدّه
جاني منجّب مسهمٍ كنّه الذيب = وفزيت فيه وشاقني زين شده
وأصغيت للسايق وقلت المكاتيب = قال استلم مني وعطني مرده
يا ابو فهد شفت الطرب والتعاجيب = كما أن شرواك يتمسك بحده
واللي ذكرته بآخر بيوتك امصيب = خطو الهبود اللي يعرّط ببده
واحيان يشرب من قطوف الشواريب = وخنافسه تاصل إلى نصف خدّه
هذاك ترضا فيه مفرية الجيب = اللي لها عن طيب الخال صده
ودك إلى منّه بدا ينقل العيب = عن عرض عصمان الشوارب تلده
يا ابو فهد شرواك ما يريد تجريب = حلال صعبات اللغوز المسده
يا ابو فهد وجّه جوابك وأنا اجيب = واللي نصادف من المشاكل نعده
=الشاعر/ فهد السبيعي الحربي

19- ترجمة شاعر

الشاعر محمد الجويدي الكتمي العلوي الحربي، انظر ديوانه في المنتدى 0

11- تلقا به عيوب

وله هذه القصيدة ، يخاطب فيها الشاعر هادي البسيس الحربي :

هات القلم يا اديب وادن المناديب = واكتب حماك الله من كل عذروب
أبيات عندي سالمات العذاريب = حيث الجواب الزين والعقل مرغوب
حضّر اهجوسك وأنتبه لي وأنا أجيب = وأطلب وتاجد والطلب منك مكتوب
الشاعر اللي ماضي له تجاريب = بالعرف والمعروف ما عاش مغلوب
أبو حسين مصعّب القاف تصعيب = له ماقفٍ بأول زمالاه محسوب
هادي عدو مشذبين العراقيب = اللي مجالسهم على عيب وذنوب
غبر الوجيه اللي بعيده عن الطيب = أقشر بشر بالحي وملقّط اذهوب
ذواهب مع سامر الليل تـهريب = ما يندرا من وين ومن أين مجلوب
ضيف اللعين ابليس ما ادري معازيب = مهما يبي منهم يوديه مندوب
أهدافهم بأعراض الأجواد تخريب = وأعمالهم دايـم على غير ماجوب
أوادمٍ ما يفهمون المواجيب = أكل وشراب ونوم ولسان شاذوب
واظنهم لو حاولو حقة الذيب = ما حصّلو منها ولا ربع مطلوب
بس الرداء منهم تبين بلا ريب = وأصبح عليهم ما ادّعو فيه مقلوب
هذه وصايفهم وأنا ما اعلم الغيب = عسا عليهم يوم الأوقاف مغضوب
واضف لهم بعض النفوس المغاضيب = لا قرّب الله دارهم لوهم احروب
انبيك عن ناسٍ جنوبٍ وتغريب = دايـم عليهم بيرق الخوف منصوب
يعوزهم مخافة الله وتأديب = سلم العرب في صوب وهم سلمهم صوب
وقتٍ به النـمّام والمخطي امصيب = واللي يشير بنية الخير مشذوب
ولا بقي ياكود طق المشاعيب = الله يعاونا على صبر ايوب
هذا حسب ما وافقن الهناديب = والماء يقولون الرياجيل مشروب
تـم الجواب وكان يحتاج تعقيب = عقّب عليه أخاف تلقا به اعيوب
واسلم فداك مكدرين المشاريب = واللي حياته كلها ما قضا النوب
= الشاعر/ محمد الجويدي الحربي

12- بينك وبيني

وله مخاطباً الشاعر هادي البسيس الحربي :

البارحه ماني من النوم ممنون=ما ادري علام النوم عيا يجينـي
وأنا بخير ولا تعلمت مفتون=والله هو ربي والإسلام دينـي
الناس قالو ينفعون ويضرون=والنافع الله والعدو اللعينـي
وأبديت ما كنيت وابليس ملعون=أبيات ما تخفا على الطيبينـي
شد المعاني ما بـها ما يقولون=منها سليمين الشرف سالمينـي
يأخذ بـها المشتاق لذات وفنون=وأبعد مدا عن غرة الغافلينـي
عبّرتـها بالعرف والعزم والهون=مع الطريق المستقيم اليمينـي
يـم الأديب معبّر القاف مازون=هادي وسيع العرف ما هو دوينـي
بأهل زمان اليوم وافي ومأمون=وأنا أتشرف بالشريف الأمينـي
اسند عليه بكل ما كان مكنون=دوسٍ على خد العدو البطينـي
للي يبيع الدم من غير قانون=شِبْه السليم وداخل الروح صينـي
أجرب ضمير مهوّجرٍ له ومرسون=يبي يـموت وذيخ جدلاء حزينـي
واللاش قالو لو تغسل بصابون=على الرداء مثل الحديد الشبينـي
هو ما درى انه تايه الرأي مديون=لله وخلق الله والوالدينـي
حسبي عليه اللي عبيده يصلون=خوفٍ رجاهم بأرحم الراحمينـي
يا ابو حسين اشرح لك الوضع وش لون=ودي يصير الرأي بينك وبينـي
وقاف الزغيبي بأول الوقت مضمون=يقول ما يعرض على العارفينـي
تـم الجواب وصاحب السوء ممهون=والذيب ما يأكل عشاه الحصينـي
واسلم فداك مقاول الحكي بادون= وإن جاء لزومٍ لازمٍ ما يبينـي
وصلاة ربي عد ما كوّن الكون=على نبيه سيّد المرسلينـي
=محمد الجويدي الحربي

20- ترجمة شاعر

الشاعر / محيسن بن الحميدي بن محيسن بن عليثة، من الكتمة، من بني علي، من مصروح، من قبيلة حرب 0 ولد في قبة، سنة 1363هـ 0
شاعر شعبي، يرسل النظم وفق ما يمليه عليه طبعه، بأسلوبٍ جيد، مميز، خالاً من التصنّع، والتكلّف، له العديد من القصائد، قالها في كثيرٍ من الأغراض الشعرية، منها هذ القصيدة الآتية، يساجل بها الشاعر / محمد الجويدي الحربي:

غثبر الصافي

هاجوس قلبي شنيع وفر دولابه = كما يفر المكينه ترس حذافـي
والقلب وان خـمّه الهاجوس واقفا به = ضيق عليّ الفـجوج وغثبر الصافـي
بأسباب ناسٍ لحبل السوء جذابه = ما تفهم البيّنه وعقولها صخافي
ناسٍ تحب الشرف والظلم ترضا به = اللي على شذبة العرقوب زهافـي
راع النـميمه على ما قيل حرنا به = خيّالهم ما يعانق جِرّة الحافـي
قامت تدخل بشوني ناس كذّابه = وأشوف حذف الحصا قدّام واخلافـي
أنا أقبس النار وإلاّ اسكر أبوابه = الحر ما أرخا جناحه لبو خطافـي
لولا شيوخ العرب زينت هندابه = واليا كزمت الصعب ماهر وعسّافـي
أشرار ناسٍ تلم الكذب تسعابه = للبطل وإلاّ التسامح عبر الانكافـي
أخص ناسٍ لعرض الناس شذابه = سني وجنّي وكذّابٍ وبلافـي
سب الأجاويد عندي قافلٍ بابه = حرام أسب الشريف وروس الأشرافـي
لا شفت عثرة رفيقي ما أتـهزا به = أشيل عنه الحمول وستره الضافـي
ولا شفت ظلٍ تعدا ما اتقدا به =الشجره اللي تـمن الظل تنعافـي
يـم الجويدي نروح ونشرح أسبابه = ما أحدٍ يحل القضايا كود عرّافـي
وإن كان منّا خطايا نقبل اعتابه = وأشيل حمل الرضا من فوق الأكتافـي
عساه يسلم لنا ما تقفي اركابه = بجاه رب الملا ومن حج واطافـي
رجلٍ يحب الشرف ويقدّر أصحابه = اللي علينا حنون وقلب ميلافـي
وعند الخوي ينثني ويقدّم احسابه = عساه يعيش الليالي دوم متعافـي
وتحية المسك والريحان يغذا به = اعداد ما لا حبرق وصب هتّافـي
والختم أصلي على المبعوث وأصحابه = على شفيع الخلايق بنشر الأصحافـي
=الشاعر/ محيسن بن عليثة الحربي

الشاعر/ مرزوق الفهيدي

21- ترجمة شاعر

هو الشاعر مرزوق بن مقبل بن غثيان المرشد، من الفهدة، من مسروح، من قبيلة حرب، ولد سنة 1359هـ، من سكان قبة 0
شاعر مجيد ، يتميز شعره بجودة الصياغة ، ورصانة الوصف ، وعمق المعاني 0

1- ما يفصّل الثوب قدّه

له هذا القصيدة ، موجهها إلى الشاعر / فهد بن محمد السبيعي الحربي ، وفي ضمنها لغزاً يطلب منه حله:

يا راكب اللي قد مضا له تجاريب = من وارد السبعين توريد جدّه
حمر شفر إلى درجن الدواليب = ما احدٍ هقا أنه عن نويه يرده
هو منوة اللي منتوٍ للمعازيب = بينه وبين معزّل الوسط مدّه
لأعرّضو لك ناطحين المواجيب = خطرٍ ونيتك للسبيعي وعدّه
ينطحك في قوله هلا بك وترحيب = وفنجالٍ أشقر حين تجلس يـمدّه
مع منسفٍ فوقه من الحيل ما هيب = مع جابةٍ تجلا عن الكبد غدّه
ثـم أنشده عن واحدٍ هرجه معيب = وإلى لبس ما يفصّل الثوب قدّه
ثوبه طويل ولا يغطي العراقيب = ومتبيّنٍ للناس غيبه وسدّه
=الشاعر/ مرزوق الفهيدي الحربي

2- والظروف تخبرها

وله رداً على قصيدةٍ لعبد الله بن هادي بن خلوي الحربي، موجهها إليه:

لابأس يا قلبٍ شكا حر الأوجاع = والحظ بار وجرّعه من امررها
وحاله يصادفها صواديفٍ أنواع = حتى تسبب للعيون بسهرها
بأسباب مجمولٍ لعوده تـمرياع = خطرٍ على راع الهوا لا نظرها
صارت لأبو سلطان مستقبلٍ ضاع = يبيني أفزع له وجينا بأثرها
أنا معك في كل مدخل ومطلاع = بالبر وإلا بالخليج وبحرها
دايـم بصفك ياذرا كل مرتاع = يا ابن الرجال اللي ينومس خبرها
اللي لهم دايـم على الخيل متباع = يجيبون حسكات الوبر من ديرها
إلى ضربو بأرضٍ ضنابيب واتلاع = كلٍ جواده للتوالي قصرها
نفزع وفزعتنا تجيكم بالاسراع = يفداك من غض النظر ما اعتبرها
إن كان هي بالجاه نـمشي له بساع = وإن كان هي بالمال ندبل مهرها
ونخالف اللي للقوانين ما انصاع = ما يصير عايق في نحرك ونحرها
واسمح وسامح كان ما أحسنت الأبداع = هذا مدايه والظروف تخبرها
=الشاعر/ مرزوق الفهيدي الحربي

22- ترجمة شاعر

هو الشاعر مسيعيد بن خلف بن حفر الجميلي، توفي رحمة الله سنة 1410هــ 0
شاعر مجيد، شعره رشيق االفظ، ينم عن أنه طويل النفس بالشعر، رصين الصياغة 0

1- عشيرك مسيعيد

له هذه القصيد، يساجل بها الشاعرين بجاد المربوث الحربي، وفايزالبسيس الحربي:

علمٍ لفاني به صنت هو وزيّاد = علمٍ لفا يطرب له البال ويزيد
يا راكب اللي هي هوا البال ومراد = حمراء إلى دنيتها تقطع الريد
حمراء تدنا للخرايـم والأبعاد = وتدني لمدنيها بعيد المواريد
يا راكبه مني إلى صرت مدّاد = اقد الطريق وحدّد القاع تحديد
وإلى مشيت تروح العصر لبجاد = وأبشر بفنجالٍ من البثل ما زيد
ولا هو على كثر الخسارات نشّاد = بأفضالكم تلقا الشحم له عرابيد
وتلقون ورعان العرب عنده أرجاد = على الصحن مثل اجتوال المفاريد
رعا الندا وإن الندا منه ينقاد = أوصل سلامي يـم قرم الأواليد
واسهر إلى منّه سرا كل نوّاد = واسـمت ترى لازم يسيلك بتنشيد
وكن الخبر خل الخبر منك لبجاد = وقل له معنيني عشيرك مسيعيد
واعرف ترى ان الهرج يبغا ويرّاد = ولا يستوي فعلٍ على غير توكيد
والهرج لا منّه قبال العرب زاد = تراه يذكر به كثير المناقيد
والزل ما يفرش على كير حدّاد = والصيد ما يرتع بحوش المعاويد
ولا يقري الجيعان شبعات الأوعاد = ولا يغني الفقري كثير المواعيد
بالك ترافق بالملا كل هبّاد = اللي بحيلات الرداء له مجاويد
لو هو ضحك سنّه على الشين لبّاد = ضحّاك في وجهك وقلبه عواقيد
متشجّعٍ رأسه بغيبات الأجواد = وربعه على درب النـمامه ملابيد
رعا الهوا لو قالو ايهيد ما هاد = لا ذاق حب منـزغات النواهيد
أنا ترا لي بكرةٍ جوف الأذواد = وسْمَه على خدَه رسومه مساويد
نشّدت عنها واخلفت ذكر الاجحاد = وخفّي خبرها واخلفوها بتجحيد
ما انساه كود طويق يذكر ببغداد = وإلاّ الحساء يذكر تعدا جليعيد
ولو زوّدو حلو السمن لي على الزاد = جميع غير مسلّهب الروح ما اريد
يا بجاد دورها تراي الجهد باد = واجهد لها يا بجاد لو بالتناشيد
ولو يعترض لك دونها كل لدّاد = جبها بوجهك عن جـميع اللواديد
واعرف ترى ماني على العذر رداد = ولا هي بعاداتك عذار ومراديد
يوم اشتكي لك ياعشيرك بالاجهاد = حيثك مثل شكوا الشريفي على عيد
خلاف ذا يا ربٍ فوق فدّاد = فجٍ عضوده عن لحوح اللواكيد
هبرٍ وهو وبرٍ ولا هو ببرّاد = يشدا ظليمٍ جفلوه الرواويد
ينصا لفايز شوق نقّاض الأجعاد = أبو ثـمانٍ مثل ذوب العناقيد
خصّه وقل كيف أنت يا قرم الأولاد = عساك في صحٍ وسرٍّ وتزويد
تراك غالي لو تنحيت ببعاد = وليه عنّا كل نوعك مصاديد
لا يجرحك غبن الليالي بالأنكاد = واعرف ترى لذات دنياك ما تفيد
وجروحها قبلك عتيقات وجداد = واعرف ترى دنياك هاذي بتجريد
والله كريـم وفعل الإله عوّاد = والصبر تلحق به على كل ما تريد
وسلامتك عدّة أرمالٍ بالأنفاد = وعداد ما خط القلم بالعواقيد
تراك غالي لو تنحيت ببعاد = وليه عنّا كل نوعك مصاديد
لا يجرحك غبن الليالي بالأنكاد = واعرف ترى لذات دنياك ما تفيد
وجروحها قبلك عتيقات وجداد = واعرف ترى دنياك هاذي بتجريد
والله كريـم وفعل الإله عوّاد = والصبر تلحق به على كل ما تريد
وسلامتك عدّة أرمالٍ بالأنفاد = وعداد ما خط القلم بالعواقيد
=الشاعر/ مسيعيد بن حفر الجميلي

2- الفرق بين الصايغين وسيع

للشاعر مسيعيد بن حفر، هذه القصيدة يساجل بها الشاعر باتل الرشيدي:

يا الله يا محيي الفياض الممحله = أنا بوجهك يا الإله وديع
ترجع لنا بالوسم من غيث الحيا = من حالوب غرٍ برقهن لميع
أنا شاقني قول الرشيدي باتل = يوضّع لكم يا الفاهيم توضيع
وأنا على قول الرشيدي قايل = اصنّع ابيوتٍ جايزات تصنيع
بعض النساء ما هن رفيقات طيّب = جرادة خضارٍ وقّعت توقيع
وفيهن من هي هِرّةٍ مكفهرّة = تواضح نواجذها من التفضيع
وفيهن من هي كل ليله تؤدِّبك = تقزيك كل الليل بالتلقيع
وتقول يا المذهوب وين أنت رايح = تقل مسويٍ بالعاهره شنيع
أول تروزك ثـم تالي تهوزك = تبيك لها دب الليال مطيع
وفيهن ملفا النقص هي والخساره = لو علمتها علمك بها يضيع
وتقول لك كان أنت زاعل تشيم = لو علمت طبعي فاخت التطبيع
بـهوتٍ لحمام الدار شطيرٍ لسانـها = وهي ما بـها نفعٍ ولاتسنيع
وفيهن من تكره بوصل العانـي = وفيهم من تشويك شوب خليع
وفيهن من توحي القصارات حسها = دايـم يلالي صوتـها رفيع
لا قلت يا بنت الحلال استريـنا = تقول لك وجعه تبا التجميع
وفيهن من تصقلك وهي تـماطق = كم تـماطق للحمار مشيع
الضرس إلى نقرس يوذّيك بالوجع = صوّت لشلاّع الضروس سريع
وفيهن من هي يا أهل الغي جنه = يربّع بـها زرع الفؤاد ربيع
ما تفرق بياض خدودها من صفارها = ومرمّعٍ فيها الحَمَار ترميّع
وإلى ضحكت لك كن مفلجها البَرَد = أو ذوب غرزٍ بالبريق يـميع
من خلقة الجيران ما ,حو حسها = هاديها خالقها بلا تطبيع
وفيهن من تصحبك بالخير دايـم = حتى بـها لك بالفراش نفيع
لا جيت من المسيار قامت تلبلبك = تلبلب بين الوالدين رضيع
وفيهن من تجزيك عن كل عذرا = مثل ما ذكر بالكلام منيع
وترى البيض مثل الصرف مع بايع الذهب = والفرق بين الصايغين وسيع
وترى غرض الصبيان بالبيض والنضا = والفرق بين الصايغين وسيع
اللي ربح واللي خسر من حظوظكم = والفرق بين الصايغين وسيع
وتـمّت وخلّوها صلاةٍ على النبي = يوم أن كلٍ يشتري ويبيع
وتـمّت وخلّوها صلاةٍ على النبي= ولابد ما هرج الثبات يريع
=الشاعر/ مسيعيد بن حفر الجميلي

23- ترجمة شاعر

هو الشاعر مفضي بن ولمان الأحمدي الحربي 0
شاعر مجيد، شعره محكم التركيب، وجزل الألفاظ، رصين المعاني، دقيق الوصف، مميز الأسلوب 0

1- يا حمود جيران

يا حمود دنّو زملنا نفارق الدوم = نبي عربنا يـم اطاريف رمان
يا حمود والله ما علينا بـها لوم = ما أستاس إلاّ وسط نـزل العليان
يا حمود كنّي عندهم باشة الروم = ويزيد ميزاني على كل يزان
الله نشد يا حمود عن معرفة يوم = وحنا ثمان اسنين يا حمود جيران
يا حمود يظهر لك صديقٍ من القوم = يظهر لك من الربع الأدنين عدوان
يا حمود للجيره قوانين واسلوم = والله ما نرضا على السلم ينهان
ما تروح ناقة جارنا وأنت شغموم = نـموت بعز ولا حكي هن وفلان
أما تجي ما دونـها شرط وعلوم = وإلاّ عوضها رأس مضحي ومشعان
= الشاعر/ مفضي بن ولمان الحربي

حدثني الأخ عذال بن عايد العميري الشمري، وروى لي بعض المعلومات، التي تؤكّد صحة نسب هذه الأبيات، لصاحبها الصحيح، وهو مفضي بن ولمان الحربي ، وقال : إنه سمع هذه الرواية عدة مرات ، من قبل عددٍ من الأشخاص ، مثل دبيس بن مهلهل العلوي العلياني الشمري ، الذي روى لي تفاصيل أخبار الشاعر مفضي بن ولمان الأحمدي الحربي ، مستشهداً على صحة الرواية بأبياتٍ أخرى ، قالها الشاعر مفضي في مناسبات مختلفة ، سنتطرق إليها بعد ذكر بعض أخبار هذا الشاعر ، حيث قال الأخ عذال بن عايد الشمر ، نقلاً عن دبيس بن مهلهل بن علوي من العليان من قبيلة شمّر ، وهو رجلٌ طاعناً في السن : إن مفضي بن ولمان المذكور قد جلا عن قومه ، بعد أن قتل شخصاً ، فحل ضيفاً عند ابن سُعَيّد من العليان ، من شمّر ، ويلقّب ابن سعيد أيضاً بـ " معشّي الذئب " فيقال إنه رجل فاضل شديد الكريم ، فلما أتى مفضي سأله عن ماذا يبحث ، فقال مفضي : أبحث عن الرعاية 0 قال له ابن سعيّد : ألا ترعى إبلنا ؟ قال : بلى 0 قيل له : وما هو اسمك ؟ قال مفضي : اسمي رويعي 0 فأخذ يرعى إبل ابن سعيّد ، وابنة ابن سعيّد تسرح معه ملحاق0وفي أحد الأيام غير عليهم ،فأخذت ذود ابن سعيّد ، وذوداً أخرى كان صاحبها موجوداً، لدى رويعي ( مفضّي )، وخويته، وكان معه حصان، فقال له رويعي: لماذا لا تلحق القوم، وتخلص الإبل منهم ؟! قال الرجل: أتريدني ألحق حصاني بذودي المأخوذة ؟! قال رويعي : اعطني إيّاه ، وإن شاء الله ليأتيك راجعاً ، هو وإبلك 0 فترجّل الرجل عن حصانه ، وناول رويعي حبل عنانه ، قائلاً ( مستهزءاً برويعي ) : خذ الحصان وأذبحهم كلهم ، لاتخلي منهم أحد 0 فأخذ رويعي الحصان ، وعلاه ، ولحق القوم عليه ، وبعد قليل عاد رويعي يسوق الإبلين كاملتين ، وفي وسطهما أربع قلائع من خيل الغزو ، فأعطاها رويعي لصاحب الحصان ، قائلاً : خذ هذه الخيل عندك ، وإذا سألك عنها أحد من قوم قل : أخذتها قلائع ، ولا تقل أخذها رويعي ، فأخذها الرجل 0
فلمّا روّح رويعي، جلس كعادته، مجلس القهوجي، ليتقهوى، ويقهوي عمّه ( ابن سعيّد ) 0 فأتت إليه الفتاة التي كانت ترافقه، في رعاية الإبل، فقالت له : قم ، واجلسْ بجانب والدي ، وأرتك على المركى 0 فنهض ، وجلس بالمكان الذي أمرته بالجلوس في ، فقالت : يا أبي ، إن هذا الرجل الجالس بجانبك ، لا يستحق أن يستخدم قهوجياً ، ولا راعياً ، وإنما هو فارساً ، حسبك من فارس !! وإن صدق ظني أنه لا يسمّى " رويعي " ، ولم يأتِ إلينا طلباً للرعاية فحسب ، وإنما لغرض ما زلت أجهله ، فأسترسلت الفتاة قائلة : اليوم هجم على لإبلنا قومٌ ، فأخذوها ، وأخذوا إبل فلان 0 إلاّ أن هذا الرجل ركب حصان فلان ، وأطلب الإبل ، وافتكها من القوم ، وقلع أربع أفراس 0
فسأله والد الفتاة عن صحة الكلام، الذي قالته الفتاة ؟ فقال رويعي: نعم، كلامها صحيح، فطلب منه ابن سعيّد أن يخبره بحقيقة أمره، فأخبره ، ثم زوّجه ابنته ، التي اكتشفته ، وأخبرت عنه 0 فأنجبت له أولاداً ، أكبرهم يدعى حمود ، وبعد فترةٍ من الزمن أصلح ما بينه وبين قوم ، فعاد إليهم ، وبعد أن استقر عندهم بعض الوقت ، وقع بينه وبينهم خلافٌ آخر ، فرحل إلى جيرانه ، وخوال أولاده العليان ، الذي سبق أن رحل عنهم سبب كلمة قالها أحد أولادهم ، لولده حمود ، ففسرها هو بأنها إساءة موجهة إليه ، وانه لم يعد له قدرٌ عندهم ، فقال بهذه المناسبة قصيدةً ، منها الأبيات الآتية :

2- يا حمود جيران

يا حمود من ديرة خوالك قزينا = أدليهم من يـمنا تدحم الجال
يا صار ما قربك يحشّم علينا = شوري عليكم دنّو الزمل نشتال
=الشاعر/ مفضي بن ولمان الحربي

3- بين الفارعي والحزومي

فلما رحل عن جيرانه، ندم على فراقهم، وعلى سوء ظنه بهم، فمما قال عنهم، وهو يخاطب طيره ( غنّام ):

غنّام وا وجدك على الغانـميني = تلقا اللحم برباعهم دب دومي
اقطع اسبوقك وانهزم يا الحزيني = لرباعٍ بين الفارعي والحزومي
= الشاعر/ مفضي بن ولمان الحربي

24- ترجمة شاعر

هو الشاعر نافل بن علي بن هادي بن عبد الله بن حسين القمامي، من المشارطة، من بني علي، من مسروح، من قبيلة حرب، من مواليد بادية قبة، سنة 1371هـ 0
قلت بعض القصائد الشعبية، في عدّة أغراض شعرية، نشرت بعضاً منها في مؤلفي الأول " ديوان المجموعة الظريفة من نوادر الأشعار النبطية والروايات الطريفة "، في طبعتيه الأولى سنة 1416هـ، وفي الثانية، سنة 1420هـ، وبعضها في مؤلفي الثالث " دليل مناهج بعض المجاهل في الأدب والمداهل والمناهل " الطبعة الأولى، سنة 1425 هـ، وفي مؤلفي الثاني وهو هذا الديوان، بعض من قصائدي، كما سيأتي، وأترك مجال النظر، التحكيم في شعري، لكلٍّ من القارئ، والمستمع الكريـمين 0
اهتم بالأدب الشعبي، وشديد الرغبة في متابعته، والإطلاع على ما يروى عنه، ولي في مجاله العديد من المشاركات المختلفة، عبر وسائل الإعلام، والصحف، والمجلات السعودية، أو العربية الأخرى 0
أصدرت قبل الطبعة الأولى من هذا الديوان ديوان، وبعدها ديوان أيضاً، كما ذكرت سابقاً، بالإضافة إلى هذه الإصدار، والذي هذه الطبعة الثانية منه 0

1- أمير من يقصده مضيوم

قصيدة ثناء ومديح في شيخ بني علي، الشيخ/ محمد بن عبد المحسن الفرم:

كان لدي بعض المشاغل، التي تتطلب مني مزيداً من المراجعات، والتي منها معاملة أراجع بها من أكثر من عشرة أعوام، وآخر الوقت فقدت بعض الخطابات التي تتعلق بها، ولا بد من أن تكون أحد مرفقاتها، لتستوفي شروط النظام المطلوبة، ولكن الشيخ/ محمد بن عبد المحسن الفرم، شيخ بني علي من حرب، بل شيخ من قست عليه الظروف، وتعذرته سبل النجاح، وبلوغ الهدف، لما مريت به، لأن المعاملة لها علاقة بالمركز لديه، وبلغته بفقد بعضها عند أحد الدوائر التي تمر بها، وقلت له إنها وجهت لدائرة تنفي وصولها إليها، وترفض إعطائي أي دليلٍ على ذلك، لعدم حجية طلبي منهم، وكذلك الدائرة التي أرسلتها، تؤكد إرسالها، وترفض إعطائي أكثر من الرقم والتأريخ الذي صدرت بهما، عند ما طلبت منها إنشاء الجزء المفقود من المعاملة، كما بدأ أول مرة، قال لي: أترك كل هذه الأمور وافعل كذا وكذا، وإذا وجدت فيه أي معارض أو إشكالٍ تعال إلينا، ولهذه الرأفة الكريمة والنفحة الإنسانية التي تبعث سرور الخاطر وتحيي الأمل، التي لمستها من خلال كلام الشيخ جزاءه الله عن ذلك خير الجزاء هاضت قريحتي الشعرية بالأبيات الآتية، فقلت حين ذلك في تأريخ 8 / 3 / 1426 هـ:

بليت والشغل ما بلّت = والعبد ما له عن المقسوم (1)
ومن رحـمته وقدرته جلت = هونـها وهانت لـي القيوم
مشاكلي كوم وانحلت = من حين واجهت شيخ القوم
أمير حربٍ إلى كلت = وأمير من يقصده مضيوم
الفرم وله وجهةٍ دلت = سبع الطوايف تجي له دوم
قـتّم سـماء جوي وهلت = عليّ بأبشع كدر وهـموم
ومن جيت أبو فيصل انقلت = بلنقعٍ ما عليها غيوم (2)
زالت عقاباتـها وذلت = من عقب ما حلها معدوم
ما تـهمه أن كثرت أو قلت = هو رمزها وأمرها المرسوم
قال امش حرٍ ولا تنلت = بـمعاملاتٍ اعقدها كوم (3)
وأن صار ما صار وانشلت = حنا وراها وفيها نقوم
محمد إلى اخطت منه زلت = وتعرضت مع لددها وهوم(4)
ولا شافته مقبل انفلت= لو هي عويصه بليا سوم
تقوى مساعيه ما ملت = ولا أقام ترحالها لو يوم
وأحلم من الحلم لا جلت = عساه يسلم لنا ويدوم

الحاشية:
====
(1)- بليت: تعبت وعييت 0 بلّت: انقطع 0
(2)- أبو فيصل: كنية الشيخ محمد بن عبد المحسن الفرم 0 بلنقع: بلقع أي خالية صافية، كناية عن الخلو من المشاكل 0
(3)- لا تنلت: لا تنشغل بما لا طائل وراءه 0
(4)- محمد: الشيخ محمد الفرم 0 اخطت: أخطأت، أي ضلت عن الوجهة الصحيحة 0

2- حاز عاليها

قصيدة ثناء موجهةً للشيخ/ بندر بن عبد المحسن الفرم، وكيل أمير اللواء الثاني والعشرين، بالحرس الوطني:

سلام الله عليكم يا أبو مشعل مسند الحيران = سلام السنه اللي خلّد الله ذكر راعيها
تحيه مفعمه بالورد والياسـمين والريحان = مطرّزةٍ بلون اليشب والياقوت زاهيها
مسطرةٍ لجنابٍ من لجأ به صار به بأمان = عزيزٍ من عزيزين أسرةٍ ما يخيب عانيها
لهم في صفحة التأريخ والموروث قدر وشأن = أمارةٍ يعز من هو عزّها ويخيب شانيها
موجهةٍ لشيخٍ في مجال الطيب ذكره بان = تحلاّ بالمناقب والمراتب حاز عاليها
بنا للمجد بالعليا بناءٍ متوطّد الأركان = تـزول الناس والباقي عملها وزين طاريـها

3- باشر رحيله

قصيدة مديح وعرفان:
العقيد في الحرس الوطني، الشيخ / ناهس بن جلاّل بن عبد المحسن الفرم، من أسرة ( الفروم )، شيوخ بني علي، من قبيلة حرب 0 نالني بمعروف، حين قصدته بطلبٍ خاصٍ بي، تعذر عليّ الحصول عليه، إلا بعد قيامه بمساعدتي، فأصبحت مديوناً لمعروفه، وإحسانه إليّ، ورجلٌ من أسرةٍ كهذه الأسرة، لا غرو أنه يعوّل عليه بمساعدة الناس، وحل مشاكلهم، وجدير بالتعاطف، والتجاوب مع الآخرين، في كثير من الأمور الإنسانية الحميدة 0 وللعقيد/ ناهس الفرم، مني بالغ الشكر، والتقدير، لتوجيب طلبي عليه، ولاهتمامه به، وبما يخدم تحقيقه، ولأخذه بيدي، حتى أن أبلغني هدفي، وعرفاناً مني بفضله عليّ، اهدي إليه هذه القصيدة الآتية:

الشكر لله ثـم لبعض الرجاجيل = اللي بهم ملجأٍ يذري دخيله
اليوم أنا عقب التعب والبهاذيل = بأقصا سعاده ما لها من مثيله
يوم اعترض لي في طريقي عراقيل= نصيت أبو خالد منجّي دخيله
نصيت ناهس الفرم يوم مال بـي ميل = يوم احترفت ولا بقي لي وسيله
وبتواضعه وتفهّمه لي بالحيل = أعاد الأمل واليأس باشر رحيله
واللي من أجله جيت حصل بتعجيل = اهتم به واهتم ليّ بتعجيله
شيخٍ سليل معربينٍ حلاحيل = جده وأبوه مسنعينٍ قبيله
الله يـجيره من جـميع الغرابيل = ويسعد جنابه في حياةٍ طويله
يا زين نفعٍ ما يوخر بتأجيل = ويا شين نفعٍ به مماطل وحيله
ولعل رجلٍ ما بظله مداخيل = ما يسخي بنفعه ولا في حصيله
تجيه نكبات الليالي مقابيل = جـميع مكروهٍ وشرٍ يجيله

4-مبهم ابنوده

ولي من القصائد في هذا الديوان (تحفة المساجلات) الطبعة الثانية، ما يلي:
انظر قصائد الشاعر نافل علي الحربي ( المؤلف ) في هذا الكتاب ضمن ديوانه في هذا المنتدى هذه الأبيات وجهتها للشاعر محمد الجويدي الحربي، وبضمنها ستة ألغازٍ، وهي كما يلي:

جبت اليراع وجبت لي طرس وأدواه= وأحضرت له فكرٍ تداعى لقَوْده
وحضر الكلام وحضّر الفكر معناه= وأنشيت من بعض المعاني أنشوده
وخصّصت موضوع النشيده ومغزاه= للشاعر اللي منتها الجود جوده
يـم الجويدي راعي العرف والجاه= أديبنا اللي دوم تثمر اجهوده
يا أبو احمود أهم شيء أتمناه= انك تكون بخير ساعة وروده
وأقبل سلامي وأبلغه من تورّاه= وسلمت يا راع الخصال المحَموده
ومن بعد ذا ارجي كلامي تملاه= وتأمّله من شان توجد اردوده
حيثك خبيرٍ بالكلام ونحاياه= تعرف مضامينه ومبهم ابنوده
أرسلت لك مني كلامٍ محاجاه= امْعقّدٍ وأبيك تفكك عقوده
أنشدك عن شيءٍ وجوده لفرقاه= وإلى ذلف هذيك حزة وجوده
وعن واحدٍ قربه سبب قرب فرقاه= وبعده سبب لاماه ونفعه يزوده
وعن واحدٍ لا حمّل الحمل يقواه= إلا حمل مسمار واحد يكوده
وعن واحدٍ لاصد تقدر تعداه= ولا أقبل امواجه ما تعدّا حدوده
وعن واحدٍ صوته بأذانيه تلقاه= ولا يسمع إلا حين تضغط اخدوده
وعن واحدٍ سوالفه حين ممشاه= واللي يبي منه السوالف يقوده
هذ1 الكلام اللي نبي شرح فحواه= خص آخره ستة بيوت امعدوده
وصلو على اللي ما تغيّر ولاتاه= عداد ذرات التراب بنفوده
= الشاعر/ نافل علي القمامي

الشاعر/ نايف أبو زوايد

25- ترجمة شاعر

هو الشاعر نايف بن رشيد أبو زوايد، من الراشد، من الفردة، من مسروح، من قبيلة حرب، ولد بادية القصيم، ومن سكانها حالياً0
شاعر مجيد، يجيد صياغة الشعر النبطي إجادةً جيدة، في جميع الأغراض الشعرية، له في هذا الديوان القصائد الآتية:

1- نية الخير

قصيدة شكرٍ موجهةً للشاعر بدر الحويفي الحربي، على أن أهدى إليه ديوانه الشعري:

سر يا قلم واكتب سلام وتحيه = تحيةٍ مقصودها نية الخير
لبدر بن عواد حقٍ عليه = دافع وفاء ما قلتها لمقصد غير
أخذت من بدر الحويفي هديه = هديةٍ عنوانها صورة الطير
فزيت في مدّة حـميد السجيه = حيث إن له عندي معزه وتقدير
يـمتاز طاروقه عن العايديه = بفعل الوفاء ومساجلات المناعير
تلقاه دايـم واقفٍ قهوجيه = في مجلسٍ فيه الوجيه المسافير
من الكرم به ميزةٍ حاتـميه = وأظن به ميزة صلابه من الزير
يفداه من ينسى مواقف خويه = واللى يبين بالقصير المعايير
نعمين ياللي تحتمون الرديه = يوم اجتوال معسكرات المسامير
ياللي لكم تأثير في كل هيه = بأفعالكم تفخر بناتٍ غنادير
قاله اجهاد اللي علومه طريه = اللي يسجون النضا بالمسابير
والمعذره قدام تنقد عليه = إن كان في نظمي للأشعار تقصير
=الشاعر/ نايف أبو زوايد

2- دانيٍ من محلي

عصير أنا عديت طعسٍ زمالي = من هاجسٍ ياتي وهجسٍ يولي
في ماقعٍ ماسومٍ أول وتالي = غرب الحموديه شمال المصلي
عليه من نوّ الثريا مدالي = ومن العقارب جاه وبلٍ يعلي
في مرقبـي متذكرٍ وش غدالي = وعندي خبر ما طاب لي ما بتل لي
وشفت المراح اللي من النـزل خالي = ومن شوفته دلت دموعي تهلي
يا دار وين اللي يحاض الدلالي = اللي إليا جاه المسيّر يهلي
أبو معلي مدهلٍ للرجالي = سوالفه عن كل همٍ تسلي
عز الله إني لا تذكرت خالي = ودي محله دانيٍ من محلي
صديقي اللي بالصداقه صفالي = رفقة غلا ما هي برفقة تغلي
=الشاعر/ نايف أبو زوايد

3- منك بالطيبـينـي

قصيدة قال في مناسبة خروج في نزهةٍ بريةٍ، وطلب منه أحد رفاقه أن يقول قصيدةً في تلك النزهة:

يا راكب اللي يهتوي راعي الكار = جمسٍ على ما تريد ما فيه دينـي
هو منوة اللي ناويٍ فيه مشوار = من القصيم يروح غربٍ يـمينـي
نتبع نسانيس الهبايب بالأقفار = مزول قيره ينهضه يدينـي
يا ما حلا تضبيطة الكيف لا صار = بين الحجر والطعس مستانسيني
اللي يحط من الشواء بجانب النار = واللي يصب الكيف للغانـميني
وسوالفٍ ما دنسوها لها كار = ربعٍ على المعروف متعاونينـي
سمحين قاسينٍ على الطيب شطار = على القسا واللين متعامليني
كله لعيني واحدٍ قال تذكار = نبـي قصيدة منك بالطيبيني
=الشاعر/ نايف أبو زوايد

26- ترجمة شاعر

هو الشاعر هادي بن سعود البسيس(1336-1418هـ)، من الكتمة، من بني علي، من مسروح، من قبيلة حرب، ولد في قبة، سنة 1366هـ، وتوفي رحمة الله، سنة 1418هـ 0
شاعر مجيد، شعره جيد، متفرد باختيار مفرداته، وصريح بطرح آرائه، وتجاربه، يتميز شعره بمعالجة الكثير من الأمور الاجتماعية الهامة 0

1- نائب وزير الداخليه

له هذه القصيدة الترحيبية، قالها بمناسبة زيارة صاحب السمو الملكي الأمير أحمد بن عبد العزيز آل سعود، نائب وزير الداخلية، لمدينة قبة، في 9/10/1413هـ:

زادت الفرحه وعمتنا السعاده = يوم جاء نائب وزير الداخليه
مرحبا يا أحمد يشرف في بلاده = رحّبت فيك الأماره والرعيه
والبلاد أخضر على خضره ازدياده = والأيادي رفرفت لك بالتحيه
من حضر هلا وأنا أرحب ازدياده = بالمعاني لك من الشاعر هديه
أنت لك بالطيب والمعروف عاده = والذي مثلك يشرفنا مجيه
تنصر المظلوم كان الوقت كاده = وللضعافا دايـمٍ نفسك رضيه
ومن يكيد اترد كيده في فؤاده = للعدو نظرتك طلقة بندقيه
يا ابن صقرٍ قادنا كفوء القياده = له على عرش القياده قابليه
في سجل الخلد له منا شهاده = إنه أخلص للجميع إبكل نيّه
جعل روحه عن لهيبه في براده = جنة الغفران للروح النقيه
والبقاء والخير كله في أحفاده = ناصرين الشعب والله ونبيه
من بعد عبد العزيز الشعب قاده = كل قايد بالعداله والسويه
السعود أهل الرياسه والسياده = حكمهم لعل ما ينـزال فيه
كل من جاهد توفق في جهاده = وأصبحت فيهم جزيرتنا بهيه
يبدي الحاضر عن الغايب وكاده = حل عصر العلم بعد الجاهليه
ولّت الأحزاب وإحروب الإباده = والمجاعه والشقاء والعنصريه
=الشاعر/ هادي البسيس الحربي

2- على الطيب راسي

وله مساجلةً مع قصيدةٍ للشاعر محمد الجويدي

البارحه جاني جوابٍ كما الماس = قافٍ سمعته من جواهر وماسي
وأخذت لي مع بحر الأفكار مرواس = وقدت السفينه بالبحر للمراسي
وقاف الجويدي صار له رد وإحساس = شغله شغلني لين ثوّر إحساسي
يا أبو حمود إن كان للعدل قيّاس = وقفتك مع عز الشرف ما تقاسي
وحنا معك لا صار للحبل مسّاس = إن جاء بعميان الضمير انتكاسي
راس العيا نقسم له الراس بالفاس = ونعطيه شربة سم ضد الغساسي
ويشرب عياه من الأواليد بالكاس = ومن الكحيله نجدعه بالمداسي
واللي حديده بين قصدير وانحاس = لازم يصديّ لو ترب النحاسي
عوج العصي ما تنعدل عقب الايباس = عودٍ عصا مع عوجته واليباسي
أشوف ناسٍ مثل دقات الأجراس = تلعي على غير السنع بالحساسي
وجندي ابليس اللي على الناس جساس = الله يغش أهل القلوب الغشاشي
بعض العرب يهرف تقل فيه وسواس = يجيب من هذا لذاك الدساسي
ومن بالوشايه يبرد الحزن والياس = يقضي حياته بالوزاء والمآسي
واللي يـموح أخطاه مع لين الأطعاس = لابد ما ياطا الحسك والهراسي
وسلمت يا أبو حمود للعدل نبراس = نعم الرفيق اللي على الطيب راسي
=الشاعر/ هادي البسيس الحربي

3- على متونه ينسفّها

وله مخاطباً الشاعر محمد الجويدي الحربي:

وجهت قافي لرئيس مجلس القمّه = بالشعر والناس تاقف في مواقفها
يـم الجويدي إليا لّمت بي ملمّه = أنصاه بالرأي والقصه موصفّها
يا أبو حمود إن دمحت لضايع الأمّه = قام يتـمادا بعيلاتٍ يصنفها
حتى الأجاويد علّق فيهم مطمّه =ناسٍ شريفه ايديها في مصاحفها
لا دين عنده ولا مذهب ولا ذمّه =شغله يخم السوالف ويتخطفها
سجلت قافي وأب انذر به هل النمّه =ناسٍ بلتني بنمتها وأنا اعرفها
أشوفها يوم تحكي فيّ ملتمّه =وأصد ما كنّي اسمعها واخالفها
يا تاعب السوء أعرف الحرف والضمّه =متابعٍ بالعلوم اللي تحرفها
إن سد هذا لزمنا الصمت من يـمّه =الناس ما تشّرف إلا من يشرفها
إليا اعترف بالخطأ ما هـمني هـمّه =يقفي وأنا أقفي ولا تجمع طوارفها
وإن ما عرف قيمة التقدير والذمّه =نبي عيونه بخمس الصدق نطرفها
إن ما اقتنع يركز القامه على الجمّه =وإن غار عدّه يرفلها ويغرفها
له شربةٍ من هاك المغراف هي سـمّه= مسمومةٍ لا شربها ما يصرفّها
من ذم غيره يبي يصبر على ذمه=وإن سوّدت له صحيفه ما ينظفها
جنّب طريق الرجال وخاله وعمه=عند العجايز على متونه ينسفّها
= الشاعر/ هادي البسيس الحربي

4- تلقاه مقضوب

وله رداً على قصيدة الشاعر محمد الجويدي " تلقا به اعيوب ":

سر يا قلم ودوّن سلامٍ وترحيب=مثل العسل بدر المباكير في كوب
أبيات ناقيها عن الشك والعيب=عن قولة القايل عذاريب ونقوب
للشاعر اللي يرمي أهداف ويصيب=تحيا بقيفانه أحساسيس وأقلوب
أبو احمود اللي من الصغر للشيب=اعدل من الميزان واحلا من الذوب
حرٍ مطاليعه بروس المراقيب=وسكر على الرديان بيبان ودروب
وجه لي أبياته معاني وترتيب=من راس ما وجّه بالأبيات مندوب
وأنا عرفت من الرموز المجاذيب=وعدي خبر بعلوم يوسف ويعقوب
اللي يبي للغافلين العواقيب=لابد ما يقلب على راسه الشوب
بالوقت هذا ما تفيد الأطابيب=والناس حط إبليس بقلوبـها ثقوب
المال لو انك تـمده من الجيب=ما ينفع المعروف يا عم بالطوب
بعض الأوادم تطلع الشمس وتغيب=جمعه خساره كاسبٍ الإثم مكسوب
المال لو انك تـمده من الجيب=ما ينفع المعروف يا عم بالطوب
بعض الأوادم تطلع الشمس وتغيب=جمعه خساره كاسبٍ الإثم مكسوب
لا يهم راسك ناشرين الأكاذيب=على شوارب شاربه ينشب الروب
الجيل الأيـمن للمراجل طواليب=والجيل الأيسر همه الزاد والثوب
من لا تعرّب ما تفيد التعاريب=ومن لا صـمد يعطي له الوقت عرقوب
ومن حط راسه تحت صقع المصاليب=تبي تشوفه بآخر الوقت مصلوب
لولا أن قدامه سيوفٍ محاديب=ما قام يدبي بالقفا تقل دبدوب
الله يعز مثبتين المراكيب=مظللين نجد عن كل لاهوب
واللي يتصور في دماغه دواليب=إن لف وإلاّ دار تلقاه مقضوب
للخير فعّاله وللشر تعذيب=مَنْ ناش حد الله له الحبل مكروب
إن شفت يـمنا مسيلمه ناشت البيب=طلّع اذباب السيف للنذل ويتوب
الزول بيّن والوسم للأجانيب = مكواه بالمعلاق والضو مشبوب
من لا فهم وأخذ بالأيام تدريب = ما عاش متعلم ولو كان موهوب

الشاعر/ هادي البسيس الحربي 19/ 5 / 1414 هـ

5- باللوازم تبيني

وله رداً على قصيدة الشاعر محمد الجويدي " بينك وبيني ":

جاني من الشاعر بيوتٍ لها لون = يجلا الصدأ حلو الكلام الثميني
يا طيب الرفقه ترى العمر مرهون = وأنت الذي وقت اللوازم تبيني
مواقف محمد بها الناس يدرون = كسّاب للطوله مع الغانميني
يا أبو احمود اليا ومرت أمر ما أخون = خذني على اليمنا يا أسد العريني
واللي علينا يا الجويدي يغلطون = من قالو إنّا للخطأ صابريني
والناس بعد الله تراهم يكفون = بالأرض للدنيا من الشاهديني
والناس من وجه المزيف يعرفون = لو رهّم الضحكه من الشاربيني
بعض البشر صورة رجل زول واعيون =لا من هل الدنيا ولا المسلميني
القلب طبل وباقي الجسم جالون = لا موديٍ حاجه ولا جاب شيني
حنا نـمد الناس باللي يـمدون = وبالله عزايـمنا تقض المتيني
صدقاننا دايـم على ما يحبون = وعدواننا منا من الخاسريني
اللي يبون محاربتنا يضيعون = يهفون مهَف معايد القريتيني
وتـم الجواب امتممٍ شرح والحون =واسمح سلمت ويسلم السامعيني
وصلو على المختار يا اللي تصلون =ما هل وسمي السحاب الغشيني
= الشاعر/ هادي البسيس الحربي

6- بألف طقّاق

وله رداً على قصيدة الشاعر محمد الجويدي " تقفاه مسباق ":

البارحه في وادي الشعر طبيت = بأمرٍ من الباري لتحريك الأشواق
طبيت في بحر المعاني وغنيت =وأخذت من سوق التـماثيل ما لاق
والقاف اعبر به على مل توريت =وأسوق قافي للمعاني وينساق
كتبت قافي للجويدي ورديت =لأبو حمود معلم الجيل الأخلاق
حيثه فهيم والتـماثيل له صيت =للعرف والمعروف طالب وعشاق
وأنا أفتخر باللي يعزك إلى جيت =مثل الجويدي دام للطيب سبّاق
يا الله عساه بعز يا حامي البيت =جعله سعيدٍ لا مشاكل ولا إقلاق
هذا الصحيح اللي طلبت وتـمنيت=للطيّب اللي لا تجاهل ولا باق
وعن كل واجب طيبٍ ما تخليت=وانصا الرجال وكل طيّب له اشتاق
وإلى نصاني قمت معه وتقصيت=صادق واصادق كل رجّال صداق
وإلى نصحني له تسمّعت وأصغيت=كم ناصحٍ شوره فتح باب الأوفاق
واللي يحذّف في قفاي المشاخيت=اصبر ما دام الصبر قدر وينطاق
وجّهت يـم الله ومن يـمّه أقفيت=الله يحاسب كل واشي ودقاق
أصد عن هذا ولا كنّي أوحيت=وأقول فيه إلى ذلف بألف طقّاق
لو اعرف اني لا بغيته تعليت= أبي الجزاء لا ألتفت الساق بالساق
عساه نقّال الحدج والحلاتيت=اللي انذبح من كسبةٍ له لها ذاق
=الشاعر/ هادي البسيس الحربي

7- والقلوب الغشيمه

وله رداً على قصيدة الشاعر محمد الجويدي " بين الحسد والنميمه ":

يعيش من قال الحروف ونضمها=مثل الزهر في روضةٍ عقب غيمه
هبت ذعاذيع الشمال بنسمها=والمسك جاء من ناقلينه نسيمه
دارت بتفكير الحكيم وحكمها=حلو المعاني والبيوت العظيمه
يسوقها بالعرفه اما يغتنمها=يسبق على نظم القوافي خصيمه
محمد حمود الطيبه يغتنمها=ياقف بها قدم الرجال الفهيمه
من الرجال اللي تقف في لزمها=عن اللوازم ما يذب الخريـمه
حاش المراجل والرذايل هزمها=عز الرفيق وسم كبد لخصيمه
اشتقت لبيوت الحكيم ونغمها=ووقعت لمحمد عسا الله يديـمه
ثارت براكين الضمير بحممها=وغدا لها بين المحاني حطيمه
توافدت يوم الجويدي زهـمها = أمواج بحر الشعر تسمع لطيمه
اليا استوا لي دربـها ما كتمها = قلبي واجاوب للقلوب السليمه
وإن كان ما غط شحمها = ما أمد بارودي لصيد الهليمه
العلم واسع والعرب في شيمها = عادات سلفها مع خلفها مقيمه
أشر بـها الشاعر وقلبي رقمها = شفت وسمع من ضايع الفكر ضيمه
دورٍ لهد روس الرجال ووسمها = يبكي منه طارق وتضحك حليمه
ناسٍ ثعالبها تفرق جزمها = عمي البصاير والقلوب الغشيمه
لو إن سرّاق الخزون يغرمها = واللي يهدم ساس المروءه يقيمه
ثوّر على روس الأعادي لغمها = ومن شذ منهم حوّلوه بجحيمه
هدت شياطين البلاد وخدمها = وجيش النفاق أخفق وكفّن زعيمه
عقاربٍ يقرص ذنبها وفمها = وإن شفتها عند اللوازم مسيمه
الناس تخطي كان ما الله رحمها = ذنب الخطأ ولا عذاب الجريـمه
ما تذكر يومٍ فيه تدفن ارممها = في مظلمٍ دب الدهر به مقيمه
وختامها بأزكا الصلاه وتممها = على النبي ما يـمطر المزن ديـمه
= الشاعر/ هادي البسيس الحربي

	يعطيك العافيه اخوي نافل علي تقبل مروري

أشكرك عزيزي نافل ابو نواف



صح السانك والسان الشعراء

بارك الله فيك وتقبل مروري

مع شكري وتقديري لك يامميز

شكراً لكم جميعاً

على مروركم وتواجدكم مع خالص شكري واحترامي